Os adestradores do Deportivo e do Celta debaterán sobre a canteira do fútbol galego

Os adestradores do RC Deportivo e do RC Celta de Vigo, Miguel Ángel Lotina e Eusebio Sacristán, debaterán sobre a canteira do fútbol galego no salón de graos de Ciencias da Educación e do Deporte. O cara a cara terá lugar o vindeiro xoves día 11 de marzo a partir das 20.00 horas e partiu da iniciativa de tres profesores desta facultade, Luis Casáis, Carlos Lago e Eduardo Domínguez, que decidiron convidar aos dous adestradores con motivo da presentación do seu libro Fútbol de base: El entrenamiento en categorías de formación. Aproveitando a presenza dos dous técnicos, os docentes propuxéronlle tamén á Radio Galega emitir un programa especial desde o centro. Este evento encádrase nas actividades do grupo de investigación HI20, que vén de asinar un contrato de I+D+i para organizar o fútbol de base do Pontevedra CF.

Pulo dos xogadores saídos das canteiras

Os impulsores desta iniciativa sinalan que ten “un sentido de oportunidade por canto neste momento os dous equipos están contando asiduamente con xogadores saídos das súas respectivas canteiras”. No caso do Deportivo, Luis Casáis sinala os nomes de Piscu, Iván Pérez, Juan Domínguez e Laure, así como os debuts de xogadores do filial como Raúl e Añón. Ademais de xogadores da casa como Oubiña, Jonathan Vila ou Roberto Lago, no caso do Celta, Casáis cita canteiráns que emerxeron este ano como Joselu, Túñez, Hugo Mallo, Dani Abalo ou Yago Aspas.
“Ademais de apadriñar o noso libro pensamos que era tamén boa idea aproveitar para facer un programa de radio centrado nese pulo das canteiras nos clubes galegos, contando con ambos adestradores”, sinala Luis Casáis, de aí a proposta que lle fixeron á Radio Galega.

Actividade ligada ao grupo de investigación HI20

O profesor pon de manifesto que isto permite ao mesmo tempo situar publicamente á facultade e as súas actividades formativas relacionadas coa licenciatura de Ciencias da Actividade Física e o Deporte, nomeadamente aquelas ligadas ao fútbol, “das que o grupo de investigación HI20 é un claro expoñente no tocante á penetración profesional de técnicos no mercado”. Neste sentido, o docente destaca que diversos membros do grupo e ex alumnos traballan profesionalmente no fútbol: Eduardo Parra no Liverpool, Jorge Álvarez no Real Madrid Castilla, Juan Solla no Cádiz ou Miguel Martínez no Mamelodi Sundowns de Surafrica, ademais do corpo técnico do Pontevedra.
Algúns deles son coautores dalgúns capítulos do libro que presentan os tres profesores e que está relacionado con contidos das titulacións deportivas da facultade. En particular está vinculado ás materias que imparten estes tres docentes: Fundamentos Didácticos do Fútbol, que aborda a fase de iniciación deportiva neste deporte, e Alto Rendemento en Fútbol, que trata os procesos de especialización. Deste xeito, o volume abrangue todos os aspectos relacionados coa formación das canteiras dos clubes, desde o traballo técnico, táctico, físico e psicolóxico nas diferentes categorías de alevín, infantil, cadete e xuvenil, ata outros temas como a alimentación, o adestramento do porteiro, a detección de talentos e a planificación deportiva.