Tanto en rugby coma en baloncesto perderon os encontros disputados esta fin de semana
Os equipos comezan con mal pé a recta final das súas respectivas ligas
As esperanzas están postas agora no resultado do Universitario Campus Ourense feminino
A pasada fin de semana rematou a competición para o primeiro equipo do Campus Ourense Rugby, que finalizou unha liga especialmente dura para a formación ourensá acadando un quinto lugar. Esta fin de semana, os demais equipos universitarios xogaron os seus encontros xa coa ollada posta nos seus respectivos finais de liga. Tanto en baloncesto coma en rugby e tanto nos conxuntos femininos coma nos masculinos, os ourensáns perderon os seus enfrontamentos.
En baloncesto, o Universitario Campus Ourense sénior masculino xogou contra o BCA Universidade un disputado encontro que rematou cun resultado final de 72-62. Foi a terceira derrota consecutiva para os xogadores que adestra Javi Pérez, que se sitúan nun onceavo posto da primeira división. A súa derrota foi acompañada pola do equipo de baloncesto júnior masculino. O Campus Ourense Blanco Amor perdeu por un destacado 111-43 contra o Marín Peixegalego, un resultado que sitúa aos ourensáns no oitavo lugar das súa competición.
A pesar de non xogar esta fin de semana, o Universitario Campus Ourense de baloncesto feminino sénior mantívose pola súa banda atento aos resultados da competición, pois si xogaron os seus directos adversarios na loita polos postos de cabeza na liga da 1ª División Autonómica Feminina. As xogadoras que adestra Roberto Rapela continúan nun segundo lugar, con 22 partidos xogados, 16 vitorias e 6 derrotas. Uns datos que manteñen ao conxunto ourensán moi preto do líder, o Arxil Mafari Café, que ten 23 partidos xogados, 18 vitorias e 5 derrotas.