Os escolares regresarán en primavera para facer a Ruta das Árbores

O pasado mes de novembro case medio cento de escolares acudiron ao campus de Ourense a coñecer un pouco máis sobre a biodiversidade do planeta a través da súa Ruta das Árbores, un percorrido por os xardíns universitarios e por especies procedentes dos cinco continentes presentes neles. Dado o éxito da iniciativa, os seus organizadores, a Oficina de Medio Ambiente da Universidade de Vigo e a Concellería de Educación de Ourense darán continuidade en 2012 a estas visitas guiadas. Será en primavera, cando as árbores recuperen o seu esplendor tras o inverno. Mentres ese momento chega, o prazo de inscrición para os centros educativos interesados xa está aberto.

“A experiencia do ano pasado foi estupenda. Os rapaces e os docentes que os acompañaron amosaron moito interese e curiosidade por coñecer as especies que temos no campus, desde as que destacan polo seu carácter histórico, porque están aquí desde que era o antigo hospital, ata as que chaman a atención por a súa procedencia de países exóticos”, explica José Manuel P. Teijeiro, responsable de xardíns e zonas verdes do campus de Ourense. El é o encargado de guiar cada grupo pola ruta, facendo fincapé nos aspectos máis interesantes e anecdóticos das 25 especies existentes nos xardíns, como a súa procedencia xeográfica, a idade de vida ou os usos, e co obxectivo último de atraer e manter a atención do público escolar.

Coñecer para respectar

En este senso, Teijeiro destaca a importancia de que os estudantes entren en contacto directo coa natureza e aprendan vendo e tocando en persoa o que se lle está explicando. “Por este motivo animamos aos centros educativos da cidade a aproveitar esta Ruta das Árbores e que se acheguen en algún momento ao longo do ano ata aquí, pois é unha pequena experiencia moi interesante para os rapaces pero tamén para os docentes”, explica o responsable de xardíns e zonas verdes. Aínda que a ruta está aberta a calquera cidadán, que pode realizala individualmente seguindo os paneis informativos colocados ao pé de cada especie, estas visitas guiadas están dirixidas ao alumnado de 1º e 2º da ESO e Bacharelato dos centros educativos da cidade das Burgas.

A actividade enmárcase dentro das accións de divulgación e sensibilización ambiental que tanto a Oficina de Medio Ambiente da Universidade de Vigo como a Concellería de Educación de Ourense realizan para espertar a conciencia ambiental e o respecto por a natureza entre as novas xeracións. “A mellor forma de respectar algo é coñecéndoa e a través de estas rutas o noso obxectivo é que os máis novos aprendan o valor da natureza que nos rodea”, destaca José Manuel P. Teijeiro.

Mentres agardan a chegada do bo tempo e do rebrote das árbores en primavera, desde a Oficina de Medio Ambiente da Universidade de Vigo continúan traballando na Ruta das Árbores, mellorando e ampliando a súa sinalización de modo que cada exemplar estea identificado para que as persoas que pasean polo campus poidan aprender e gozar da biodiversidade a pequena escala do planeta dispoñible nos xardíns universitarios.