Esdemga organiza tres obradoiros de creación na Casa das Campás entre o 4 e o 6 de xullo
Os novos deseñadores buscan inspiración no feito a man
O prazo de inscrición manterase aberto ata o vindeiro 30 de xuño
Na procura de novas alternativas para pór en valor o traballo dos novos deseñadores. Baixo este obxectivo, Esdemga, Estudos Superiores de Deseño e Moda de Galiza, coa colaboración da Vicerreitoría do campus, organiza por primeira vez tres obradoiros de creación que fusionarán artesanía e deseño. Do 4 ao 6 de xullo deseñadores do mundo da moda como Carlos Díez, American Pérez e Nando Cornejo traballarán cóbado con cóbado con recoñecidos artesáns da talla de Carlos Manuel Fontanes, Anna Champeney e Idoia Cuesta, para crear unha base común a partir de distintas visións da arte .
O feito a man achega un valor engadido ás pezas ao ser únicas e exclusivas, converténdose nunha posibilidade “que lles permitirá aos creadores novos revalorizar os seus deseños, facéndose un oco no mundo da moda cunha visión experimental e innovadora e, ao mesmo tempo, achegada á herdanza do saber facer dos seus antepasados”, explican dende Esdemga.
Coa mestura de ideas procedentes da artesanía e do deseño, os obradoiros pretenden crear unha linguaxe común entre as diferentes disciplinas e o alumnado “na que a convivencia e o traballo común resulten en obxectos, prendas ou tratamento de materiais novos, apostando pola mestizaxe e pola creatividade". Por outra banda, ademais de fomentar ese clima de creación, tamén haberá espazo para o debate e a reflexión sobre o valor do obxecto único e da súa proximidade co luxo no momento actual.
Tres obradoiros simultáneos
Desenvolveranse tres obradoiros simultáneos nos que participarán cada un dos deseñadores e dos artesáns convidados. Así, o primeiro taller compóñeno o modisto Carlos Díez, cun estilo radical e alternativo, e Carlos Fontanes, dedicado á cestería e á investigación coa técnica da vimbia viva, onde o artesán dirixe a planta para conseguir que a peza se cubra completamente. American Pérez e Anna Champeney conforman o segundo obradoiro no que conflúen os deseños modernos e actuais de Natalia Pérez e Jorge Bolado coa felpa galega ao estilo tradicional de Champeney. O terceiro e último obradoiro fórmano Nando Cornejo, especializado en deseño gráfico, e Idoia Cuesta, que afonda na aplicación das técnicas tradicionais a novos materiais e fibras naturais, buscando a innovación na creación de pezas artesanais contemporáneas.A cita iniciarase en aberto o 4 de xullo na Casa das Campás, onde os directores de cada obradoiro presentarán o seu traballo para concluír o 6 de xullo na Facultade de Belas Artes cunha posta en común dos diferentes talleres, onde se mostrarán os proxectos resultantes.