Diario da Universidade de Vigo
José Manuel Pazos coordina a Unidade de Voluntarios en eventos deportivos
Os participantes do Campionato de Duatlón de España puxéronse nas mans do alumnado de Fisioterapia
En plena época de exames os alumnos e alumnas colaboran en diversos maratóns e carreiras populares
Alumnos de 3º e 4º colaboraron no Campionato de España de Duatlón
Xunto aos cordinadores de grupo atenderon ao redor de 100 persoas
Non é a primeira vez que colaboran de xeito voluntario en maratóns e carreiras popularesjpg
Entre exame e exame 11 alumnos e alumnas de 3º e 4º curso do Grao en Fisioterapia buscaron un oco para colaborar de xeito totalmente desinteresado no Campionato de España de Duatlón que tivo lugar esta última fin de semana en Pontevedra. Entre o sábado e o domingo, estes futuros profesionais atenderon ao redor dunhas 100 persoas das máis de 500 que se inscribiron para participar nalgunha das tres modalidades do campionato: deportistas de elite, paraduatlón e carreira popular. Esta colaboración non é unha excepción, xa que a Unidade de Voluntarios de Fisioterapia en eventos deportivos realiza unha media de entre 12 e 15 actividades extracurriculares coma esta ao ano, segundo salienta o seu coordinador, José Manuel Pazos.
Para o alumnado esta “é unha oportunidade única que serve de complemento á súa formación académica nun momento complicado, xa que, os alumnos e alumnas están en plena época de exames e moitos deles preparando o seu traballo de fin de grao”, destaca Pazos. Con todo, cómpre salientar que unha pequena parte do alumnado da facultade, toma contacto, por primeira vez, coa realidade da profesión e máis cos pacientes a través deste tipo de actividades “aportándolle aos eventos deportivos un valor engadido digno de mención”. O traballo duro, o traballo de verdade realízano os voluntarios, “eu son un mero administrador”, destaca o coordinador.
Os usuarios e usuarias deste servizo amósanse agradecidos e valoran moi positivamente a colaboración do alumnado da Facultade de Fisioterapia. Para Pazos, proxectos coma este “dan boa mostra do traballo diario que realizamos con outras moitas institucións da cidade”. A maiores, son tamén ex alumnos e alumnas da facultade quen axudan aos futuros profesionais neste tipo de actividades exercendo de coordinadores de grupo no lugar de traballo.