Un paso adiante en baloncesto, un paso atrás en rugby

Vitorias en baloncesto e derrotas en rugby. Este é o resumo desta fin de semana de competición para os equipos do campus ourensán. O Universitario Campus Ourense de baloncesto sénior masculino conseguiu finalmente rachar cunha vitoria a cadea de derrotas que acumulaba, mentres as súas homólogas femininas consolidaban o seu liderado na primeira división autonómica da súa categoría. Pola contra, os tres equipos do Campus Ourense Rugby que xogaron esta fin de semana, o masculino, o feminino e o cadete, regresaron a casa con cadansúa derrota.

Despois de perder os últimos catro encontros, o Universitario Campus Ourense masculino sénior gañou o sábado ao CD Recimil nun disputado partido que rematou cun resultado final de 50-62 puntos. O marcador coloca aos xogadores que adestra Javi Pérez nun décimo lugar, ascendendo un posto respecto á xornada anterior. Esta vitoria consegue dar un respiro aos xogadores e equipo técnico e devólvelles parte da ilusión e a confianza perdida polos malos resultados que estaban acumulando.

Seguindo estes bos resultados, o equipo de baloncesto sénior feminino celebrou a fin de semana a súa décima vitoria consecutiva. As xogadoras que adestra Roberto Rapela gañaron de xeito contundente ao La Salle, cun marcador final de 71-49 puntos. Esta resultado é especialmente importante para as ourensás porque consolida o seu primeiro posto na primeira división autonómica feminina e porque a vitoria foi contra un dos seus inmediatos contrincantes na loita polo liderado da liga.

Tres derrotas en rugby

En contraposición a estes bos resultados, os equipos masculino, feminino e cadete do Campus Ourense Rugby perderon os seus encontros fóra da casa durante a fin de semana. O equipo sénior desprazouse a Lugo para xogar fronte o Muralla, equipo contra o que por segunda vez consecutiva perdeu, nesta ocasión cun resultado final de 49 a 24 puntos. Esta derrota ten un sabor especialmente amargo para os xogadores ourensáns porque os afasta do terceiro clasificado da súa liga, Lalín, e polo tanto dos postos de cabeza.

O equipo feminino de rugby pola súa banda desprazouse a Lalín para tentar conseguir a primeira vitoria de liga pero finalmente perdeu por un resultado final de 27 a 6 puntos. A inexperiencia en competición oficial das ourensás está a pasarlles factura nos resultados aínda que manteñen toda a ilusión do primeiro ano de competición. Tamén sufriu unha derrota o equipo cadete, que perdeu contra o CRAT na Coruña por 39 a 3 puntos.