Patricio Sánchez e María del Pino Díaz, entre as persoas galardoadas coas distincións ao mérito deportivo da Xunta de Galicia

Este martes pola noite, o Teatro Jofre de Ferrol acolleu o acto de entrega das distincións ao mérito deportivo 2023 da Xunta de Galicia, presidido polo presidente Alfonso Rueda. Entre as 108 persoas e entidades que recibiron a máxima condecoración do deporte a nivel autonómico estiveron os profesores do campus de Ourense Patricio Sánchez e María del Pino Díaz. Estas distincións son concedidas anualmente logo de proposta motivada dun xurado en recoñecemento do labor ou traxectoria, notoria e exemplar no ámbito deportivo de Galicia, ás persoas ou entidades que estean contribuíndo ou contribuísen ao crecemento, promoción, fomento e excelencia do deporte e da educación física en Galicia.

Tanto Patricio Sánchez como María del Pino Díaz contan cunha dilatada traxectoria vinculada ao ámbito de deportivo que abrangue desde a práctica (como deportista e/ou na arbitraxe) ata a docencia, a xestión e a investigación. Así, entre outros méritos, Patricio Sánchez, profesor da Facultade de Ciencias Empresariais e Turismo, é coordinador do Mestrado en Xestión Empresarial do Deporte, considerado o segundo mellor de Europa no seu eido, e pertencente ao Comité Galego de Árbitros, sendo ademais vogal de Natación do Comité Nacional de Árbitros, árbitro internacional de Augas Abertas e membro da Liga Española de Natación. Agradecendo ao xurado a concesión desta distinción, o docente destaca que “é unha alegría recibir un recoñecemento polo teu traballo”, e especialmente neste caso pola súa traxectoria “sempre vencellada ao mundo de deporte”.  Outro motivo de satisfacción, engade, “é que entendo a distinción dun xeito colectivo, posto que se me entrega a min como representante do MBA Deporte da Universidade de Vigo, que é un proxecto que conta cunha grandísima equipa detrás e moitas horas de traballo ilusionado e apaixonado”.  

Igualmente, María del Pino Díaz, profesora da Facultade de Educación e Traballo Social, destaca a súa satisfacción por ter acadado este recoñecemento e o seu agradecemento pola concesión. “Sempre é gratificante ver recoñecido o esforzo feito”, apunta. No seu caso, indica, a distinción recoñece unha traxectoria na que ao longo dos anos pasou por case todos os roles asociados ao deporte, “desde deportista, xuíza, adestradora, formadora de adestradoras e psicóloga da Federación de Ximnasia ata agora na formación de profesionais (mestres, educadores sociais e traballadores sociais) utilizando o deporte como unha ferramenta educativa, sen esquecer a investigación e a xestión deportiva”. Entre outros moitos méritos, a profesora ten sido membro da selección nacional absoluta de ximnasia rítmica nos anos 80, sendo quinta no campionato do mundo.