No documental "O abismo amazónico" proxectado na Semana Internacional de Cine Submarino
Un percorrido polo Amazonas con feras e estrañas criaturas da man de Andy Byatt
O biólogo J.A. Romero colabora en varios proxectos co inglés
“Unha experiencia única, fantástica e espectacular”. Así calificou Andy Byatt a expedición científica que viviu no Amazonas. Acompañado polo biólogo mariño Juan Antonio Romero, o director inglés amosou o resultado do seu traballo este mediodía no salón de actos da Facultade de Ciencias do Mar coa proxección do documental O abismo amazónico. O obxectivo da reportaxe centrábase en “romper cánones e descubrir novas especies animais da zona”, explicaba Byatt. Un reto máis que logrado, pois “converteuse na serie máis vista da BBC marcando unha nova liña na cadena e acadando un perfil de audiencia diferente ata o de entón”, sinalaba Romero. Non obstante, pese ás múltiples exploracións feitas, “aínda queda moito por descubrir”, remarca o inglés, de aí que se estean a realizar entre unha e dúas expedicións cada ano.
A gravación levouse a cabo no ano 2004. Foron seis meses de intenso traballo para o cal se contou cun gran despregue técnico e humano. Os primeiros noventa días adicáronse a realizar un recoñecemento, a partir de aí comezou o percorrido polo río Amazonas nunha viaxe de 3200 quilómetros “para estudar as zonas máis recónditas, aínda non exploradas, onde existen as criaturas máis estrañas e feras do mundo” subliñaba Byatt.
No documental pódense contemplar caimáns de máis de 200 quilos entre rápidas e perigosas correntes, tamén un peixe gato xigante, anguías eléctricas capaces de descargar 600 voltios e as serpes máis grandes do planeta. Ademais, a bordo dun moderno batiscafo, a 40 metros de profundidade, os científicos descobren nas turbias augas varias criaturas endémicas entre as que destacan uns peixes máis voraces cas pirañas.
Byatt e Romero, comprometidos co mundo mariño
Licenciado en Hidroxoloxía, Andy Byatt coñeceu de neno en Cuba o paraíso do océano tropical e partir de entón converteuse nun apaixonado do mar. Durante máis de 18 anos estivo na Unidade de Historia Natural da BBC, para a que gañou varios premios de vida animal, traballando como produtor e director. Fixo numerosos documentais para a cadena e especializouse en programas de submarinismo con producións como Blue Planet, momento no que coñece a Juan Antonio Romero; Amazon Abyss; Planet Earth e o coñecido filme Deep Blue. Actualmente, dirixe unha compañía de produción independente, Orca Visión e está desenvolvendo próximos proxectos cos produtores de Cool Blue.Pola súa parte, Romero estudou Bioloxía Mariña en Francia e comeza a súa andaina en 1988 con Jacques Ives Cousteau a bordo do Calypso. Dende entón traballou como director, asesor científico e cámara para Discovery, National Geographic, Arte e Chanel 4 entre outros. Fai tres anos creou a produtora J.3films e a día de hoxe prepara El Pulpo gigante de Alaska e unha nova serie, conxuntamente con Byatt, para a BBC.