Curso de 'Creación de tipografía dixital' na Aula Tecnolóxica da Casa das Campás
O poder ‘invisible’ da tipografía no deseño gráfico
O período de inscrición desde a plataforma Bubela remata mañá venres e a docencia dará comezo o próx
A tipografía caracterízase pola súa discreción, pero o certo é que a súa correcta selección marca a diferenza entre un bo e un mal deseño gráfico. Debido a súa importancia, o interese dos profesionais, tanto pola súa aplicación práctica como teórica, vai en aumento. Para dar resposta a esta demanda xurde o obradoiro de Creación de tipografía dixital, coordinado polo docente en Belas Artes e director da Área de Imaxe da Universidade, Marcos Dopico, que considera este curso “vital para a formación dun deseñador gráfico”. Aberto para toda a cidadanía e gratuíto, o curso impartirase na Aula Tecnolóxica da Casa das Campás e o período de inscrición, desde a plataforma Bubela, remata este venres.
Para o responsable do obradoiro, é importante que todos os profesionais do deseño gráfico “se sensibilicen coa disciplina” pois a tipografía é un elemento “omnipresente no noso traballo”. Considera que non é necesario converterse nun deseñador tipográfico, pero si “coñecer a historia da tipografía, porque xurdiron unhas formas nunha época ou noutra ou como aplicar a tipografía nun traballo editorial, corporativo ou web”. Este obradoiro afonda nesa visión xeral achegando aos asistentes coñecementos sobre os principios fundamentais da tipografía dixital, dos recursos técnicos e das ferramentas para ser quen de crear e desenvolver propostas creativas neste eido do deseño. Cunha visión moi práctica, o obradoiro inclúe todo o proceso de dixitalización dunha fonte, desde as técnicas de debuxo vectorial ata a xeración de novos formatos.
Unha disciplina ‘discreta’
A tipografía como disciplina “é algo no que ninguén repara”, o que resulta lóxico segundo Dopico pois “debe ser un vehículo de comunicación que debe pasar desapercibido, debe cumprir a súa función de lectura sen distraer ao espectador”. Agora ben, que o seu poder de persuasión “sexa discreto” non se traduce en que perda relevancia, pois nesta confusión é onde aparece “o feísmo gráfico con fenómenos como a Comic Sans, unha tipografía deseñada para un público infantil e utilizada sen sentido en calquera contexto”, subliña o docente.Grazas ao desenvolvemento da tecnoloxía dixital na década dos oitenta, o campo da tipografía foi gañando adeptos e estase a converter nun terreo “de auténtica experimentación”. Este interese está avalado ademais pola cada vez maior cantidade de información visual, polo que a tipografía está substituíndo á anterior tendencia de confiar toda a identidade corporativa a un símbolo. Isto provoca que “a creación tipográfica se estea a converter no elemento gráfico que máis define a unha marca”, engade Dopico.
Próximos retos
Aínda que a súa vertente práctica se atopa bastante consolidada, o certo é que a tipografía comeza a propoñerse como terreo de investigación académica, cunha orientación “máis expresiva, estudada desde a forma, tratándoa como unha imaxe máis”, engade o experto. Conclúe que o reto principal pasa por “acadar unha sensibilidade arredor desta disciplina que provoque unha mellora na calidade dos proxectos de deseño”.O curso de Creación de tipografía dixital, de carácter presencial, ten unha duración de doce horas repartidas entre os días 14, 16, 18, 21, 23 e 25 de marzo en horario de 19.00 a 21.00 h.