120 estudantes de máis de 30 países visitan Galicia ata o vindeiro sábado 10 de agosto
Pontevedra, capital mundial das Ciencias Forestais
Enrique Valero exerceu de anfitrión na cerimonia de benvida que tivo lugar este martes
Brasil, Uruguai, Arxentina, Estados Unidos, Canadá ou Corea do Sur son algúns dos países de orixe dos 120 estudantes de forestais que están a pasar estes días en Galicia dentro da 41 edición do Simposio Internacional de Estudantes de Ciencias Forestais (IFSS), que se está a desenvolver por primeira vez na súa historia en España, e que pretende ser un espazo de intercambio de coñecementos e experiencias vinculadas con este sector. O director da Escola de Enxeñaría Forestal, Enrique Valero, exerceu este martes no campus como anfitrión de excepción dándolles a benvida a todos os participantes nun emotivo acto no que tamén se lles fixo entrega dun diploma acreditativo a cada un dos mozos e mozas.
A Escola de Enxeñaría Forestal da Universidade de Vigo “ten un lugar destacado neste sector”, algo que se reflicte na elección do centro como punto de encontro “dun simposio mundialmente coñecido e valorado” e organizado pola Asociación de Estudantes de Ciencias Forestais (IFSA). “O recoñecemento da nosa escola é froito do traballo duro e constante, un feito que conseguiu situar este centro como un referente a nivel nacional e internacional”, salientou Valero.
A elección de Galicia como un dos espazos no que se desenvolve este simposio responde, segundo o director da Escola de Enxeñaría Forestal, a moitas variables: a pesares de que a maior parte da produción forestal a nivel mundial se concentra en países como Uruguai, Indonesia ou Brasil, “poucos saben, salvo os expertos nesta ciencia, que a nosa comunidade é xunto con Portugal unha das principais produtoras de cortiza”.
A recompensa a un grande esforzo
Este simposio internacional acolle tamén a Asamblea Xeral da Asociación de Estudantes de Ciencias Forestais, na que os integrantes de IFSA debaterán e aprobarán diversas propostas relacionadas co presente e futuro da asociación. A maiores, e como cada ano, está previsto que desta xuntanza saia o nome do novo presidente ou presidenta da agrupación para os vindeiros 12 meses.Para o actual dirixente, Daniel Schraik, estas xornadas requeriron “moito esforzo e vontade” ata chegar ao punto de “ter que deixar momentaneamente os estudos a un lado para encargarme da asociación”. As claves para acadar o éxito deste e doutros simposios é o traballo en equipo e a figura do líder, asegura Schraik. Entre as recomendacións para o novo presidente ou presidenta o austríaco asegura que “canto máis te esforces máis recibirás a cambio”.
Un amplo programa de actividades
A organización local do simposio en Galicia programou varias actividades para este martes. A primeira hora da mañá, os 120 mozos e mozas achegáronse ata o Parque Natural de Monte Aloia logo de cancelarse a visita á fábrica de Ence en Pontevedra “por motivos alleos á organización” tal e como salientou o membro da Delegación de Estudantes da Escola de Enxeñaría Forestal Pablo Rial. Este alumno do terceiro curso de grao foi o encargado de xestionar boa parte dun programa no que se inclúe para a noite deste martes unha cea con varios responsables de Swarovski, unha firma que cedeu varios binoculares e telescopios para usar na visita que os rapaces e rapazas realizarán este mércores ás Illas Cíes.Para dar a coñecer de primeira man a labor das comunidades de montes, este xoves 8 os participantes percorrerán o Lago Castiñeiras, unha visita importante xa que “son figuras que veñen de moi antigo e que só están vixentes en Galicia e parte de Asturias”, destaca Rial. Ao día seguinte, venres 9 de agosto, os asistentes ao simposio trasladaranse ata o concello lucense de Friol para visitar os aproveitamentos de FINSA e, para rematar a súa estancia en Galicia, realizarán unha ruta polo Courel. O domingo 11 os 120 participantes comezarán co seu camiño de volta a Madrid deténdose primeiro na provincia de León, onde teñen programadas varias actividades e visitas guiadas.