Se pórse en forma está entre os propósitos para 2014...

Co inicio dun novo ano son moitos os desexos de cambiar de hábitos de vida ou de mellorar determinados aspectos. Un dos máis comúns, acentuado polos excesos do Nadal, é o de practicar máis deporte, ben sexa para adelgazar ou para ter unha mellor condición física. Para os membros da comunidade universitaria e para as persoas alleas a ela, o Servizo de Deportes do campus de Ourense pon en marcha neste segundo cuadrimestre un amplo programa de actividades e servizos. Unha vez máis, as escolas deportivas serán as estrelas desta programación grazas á súa ampla oferta de modalidades, que van desde a natación e o pilates ata o xadrez e a defensa persoal.

40 opcións de escolas deportivas

“Agora é o momento de que as persoas que están buscando algunha actividade de exercicio ou ocio na que inscribirse boten un ollo á programación do Servizo de Deportes e se apunten no que máis lle guste ou no que máis se adapte ás súas necesidades. Hai unha variedade moi ampla e atractiva de posibilidades”, destaca Rodrigo Alberte Pivida, responsable do Servizo de Deportes do campus de Ourense. Este cuadrimestre apunta, volven de novo a abrir as súas portas as escolas deportivas, que ofertarán aos membros da comunidade universitaria arredor de 40 opcións, como son natación, tenis, voleibol, defensa persoal, aero-jump, rugby, salvamento acuático, xadrez, pilates, ioga, danza da Polinesia, baile latino, street e break dance, iudo, danza oriental, adestramento persoal e aeróbic, entre outras. “Sempre intentamos mesturar modalidades que teñen un público fiel con novas opcións para poidan atraer a novos públicos á práctica deportiva”, comenta Pivida.

Os inscritos nestas escolas teñen clases semanais ao longo do cuadrimestre nos espazos habilitados, que poden ser as propias instalacións do campus de Ourense, como o pavillón, as pistas de tenis, o campus de futbol-rugby e a ludoteca; a piscina universitaria CDU-AQA e centros externos como Bregma, Pavillón dos Remedios, Camino Pilates, Casa del Elefante, Enka Danza Oriental, Sabrosura e os ximnasios Marbel, 2000 e Dinamic Center. O prazo para inscribirse nelas estará aberto do 20 ao 24 de xaneiro para as persoas que renoven e do 29 de xaneiro ao 5 de febreiro para as novas incorporacións.

Abonos e eventos

Para os membros da comunidade universitaria pero tamén para as persoas alleas a ela que desexen aproveitar as instalacións e servizos do campus, o Servizo de Deportes ofrece unha serie de abonos e tarxetas con diferentes vantaxes. Segundo a modalidade que merquen e o tipo de público que sexan, os usuarios poderán empregar durante o cuadrimestre instalacións tanto de uso individual coma colectivo do campus, como a súa sala de cardio-fitness, pistas de atletismo, tenis de mesa, pistas de tenis, campo de herba sintética ou o pavillón. Entre as novidades deste curso académico, ofértase unha tarxeta para empregar de xeito combinado as instalacións deportivas do campus e a piscina universitaria. “Durante o primeiro cuadrimestre esta tarxeta combinada tivo moitísimo éxito a pesar de ser a primeira vez que se ofrecía”, apunta o responsable do Servizo de Deportes do campus de Ourense. A solicitude dos abonos pode realizarse en calquera momento do ano, sendo o período de actividade para este segundo cuadrimestre do 1 de febreiro ao 30 de xuño.

Alén desta programación, o Servizo de Deportes continuará ofertando dentro da súa programación as rutas culturais, das que aínda quedan sete traxectos por realizar; o programa Ponte en Forma, de atención personalizada, e os seus servizos de Fisioterapia e Medicina Deportiva. Cos equipos universitarios e os federados xogando nas súas respectivas competicións, o campus de Ourense, apunta por último Rodrigo Alberte Pivida, acollerá en febreiro a final das ligas universitarias Intercampus, en marzo o Campionato Universitario de Squash e antes de que remate o curso o II Fitness Day.