Unha prenda de Esdemga na lista de agasallos de Nadal

Este ano en lugar de mercar unha camiseta de Inditex como agasallo de Nadal para os seres queridos, pódese ser máis exclusivo e optar por unha deseñada polo alumnado de Esdemga, Estudos Superiores de Deseño Téxtil e Moda de Galiza. Dende este venres e ata o vindeiro 5 de xaneiro calquera pode achegarse ata unha pequena tenda na Rúa de Prudencio Landín número 10 (detrás da Subdelegación do Goberno), aberta de luns a sábado en horario de 11.30 a 14.00 horas e de 17.00 a 21.30 horas, na que os estudantes terán á venda prendas confeccionadas durante as súas horas de clase.

Esta iniciativa xorde da man do alumnado interesado en continuar coa primeira experiencia comercial levada a cabo en Debut 2011 coa instalación dun showroom á beira da pasarela. “Os estudantes quixeron ampliar ese proxecto dun só día e desenvolver unha estratexia de ventas que lles permita recuperar algo do diñeiro investido nas súas creacións”, explica Lola Dopico, directora de Esdemga. Ademais de recadar fondos para futuras coleccións, a xestión desta tenda por uns días permitiralle ao estudante coñecer todo o ciclo de comercialización dunha prenda de moda ademais de contactar directamente co cliente, “recibindo información de como o seu produto é percibido polo mercado”, engade Dopico. Para sacar o máximo proveito desta experiencia, colocarase na tenda un libro de suxestións no que calquera cliente pode deixar un comentario sobre o que lle gustou ou non da roupa ofertada. “Queremos recoller a opinión da cidadanía para facernos unha idea de como as súas propostas son contempladas na contorna”, sinala a directora de Esdemga.

Dende camisetas a paxarelas

O potencial cliente disporá dunha gran variedade de propostas, todas de carácter exclusivo e confeccionadas de maneira artesanal. Moitos dos produtos á venda son resultado de proxectos desenvoltos en clase, “aínda que algúns, aproveitando a ocasión, deseñaron prendas ex professo para pór a disposición do público”, salienta Dopico. O cidadán atoparase con camisetas estampadas a man, camisas, bufandas de moi diferentes cores tecidas no obradoiro de punto, bixutaría, bolsos, garabatas, “ata unha colección de paxarelas artesanais e innovadoras deseñadas por dúas alumnas da escola”.

Para levar adiante este proxecto, Esdemga contou co apoio incondicional de Escoitar.org, “un colectivo que traballa na difusión da cultura e que leva colaborando coa escola dende o principio”. Escoitar.org encargouse de toda a organización do proceso de venta, “xa que os estudantes de forma independente non poderían vender de forma regular”, apunta Dopico.