A preparación física do Spartak de Moscova, en mans dun galego

Máis de 4000 quilómetros separan a súa Ribeira natal da cidade rusa de Moscova, lugar no que Luís Casais fixou a súa residencia dende a súa incorporación ao FC Spartak de Moscova como preparador físico do primeiro equipo. Hai pouco máis de seis meses, o seu homólogo Eduardo Domínguez ofrecíalle a Casais a posibilidade de incorporase ao Departamento de Sport Sciencies do club de fútbol ruso ocupándose, en primeira instancia, da preparación física e do adestramento do equipo filial e mais da academia de formación da entidade deportiva. A súa oportunidade para unirse ao primeiro equipo non tardou en chegar e hoxe comparte banco co adestrador principal, o ex xogador do Real Club Celta de Vigo, do Valencia CF e da Real Sociedad, Valery Karpin.

A prevención de lesións, a nutrición deportiva, a análise do rendemento físico a través de diversas probas de esforzo ou os programas informáticos empregados no seguimento das actividades dos xogadores en adestramentos e partidos son algúns dos asuntos que xestiona Luís Casais no departamento Sport Sciencies do club xunto a Eduardo Domínguez. Casais recoñece que a experiencia adquirida na súa etapa anterior como adestrador físico en equipos de segunda e terceira división galegos e tamén como docente no ensino medio e mais na Facultade de Ciencias das Educación e do Deporte “achega toda unha bagaxe de novos coñecementos que facilmente podes aplicar á hora de traballar con futbolistas de alto rendemento”.

Perseguindo a excelencia investigadora

Ademais de explotar a súa faceta máis profesional, Luís Casais segue inmerso noutra das súas paixóns: a investigación. O adestrador físico segue a traballar co grupo HI20 da Universidade de Vigo xunto ao propio Eduardo Domínguez e outros investigadores que se atopan fisicamente no campus pontevedrés. A maiores, aproveita a súa estadía no Instituto Pedagóxico de Cultura e Deporte da Moscow City Teacher Training University. “En Moscova existen catro universidades que imparten a titulación de Ciencias da Actividade Física e do Deporte. Esta é un dos referentes ao tratarse dun centro estatal que conta cun profesorado de elite: ex campións olímpicos ou adestradores de renome, por poñermos un exemplo”, comenta. Coñecer outro ambiente universitario diferente ao español e adquirir formación no eido do adestramento nun lugar de referencia neste eido do deporte “foi algo que valorei moitísimo para decidirme a realizar esta estadía”, conclúe.

Con todo, tanto Luís Casais como Eduardo Domínguez seguen moi pendentes dende Moscova dos últimos pasos dunha spin-off nada no seo do grupo de investigación HI20 da universidade. “Pretendemos comercializar varios produtos de software que desenvolvemos para poder planificar adestramentos, a análise técnica dos deportes ou mesmo para a prescrición dun determinado exercicio”, sinala Casais. Nesta andaina colaboran o ex preparador físico do Real Club Celta de Vigo ou do Mamelodi Sundowns Football Club (Sudáfrica), Miguel Martínez, e o tamén ex preparador físico do Pontevedra CF, do Villareal CF e do Kerkyra FC (Grecia), Juan Solla.