A profesora Mª Reyes Pérez ingresa na Academia de Enfermería de Galicia

O Liceo de Ourense acolleu este xoves pola tarde a sesión solemne de recepción e investidura de Mª Reyes Pérez, profesora da Escola Universitaria de Enfermaría (centro adscrito ao campus de Ourense), como académica de número da Academia de Enfermería de Galicia. O acto arrancou coa apertura a cargo do presidente desta academia, Isidoro Rodríguez, continuou coa lectura da acta de nomeamento por parte do vicesecretario xeral da entidade, Manuel Eladio Atrio, para de seguido Reyes Pérez realizar o seu discurso de ingreso, titulado Un novo modelo de termalismo: o termalismo ourensán como estilo de vida e recurso terapéutico, sendo a contestación realizada pola académica numeraria Miriam Vázquez.

O acto contou coa asistencia de membros da comunidade universitaria do campus de Ourense xa que a homenaxeada, ademais de ser profesora da Escola Universitaria de Enfermaría é docente no Mestrado Oficial de Turismo de Interior e de Saúde, que se imparte na Facultade de Ciencias Empresariais e Turismo, e dos programas de doutoramento das facultades de Ciencias e Ciencias da Educación e Traballo Social, tendo dirixido cinco teses de doutoramento e publicado máis de 25 artigos científicos, a metade en revistas indexadas en Journal Citation Reports. Así, entre outros, estiveron Francisco Javier Rodríguez Rajo, vicerreitor do campus de Ourense; Mª Milagros Fernández, directora da Escola Universitaria de Enfermaría; María José Pérez, decana da Facultade de Ciencias, e Mª Montserrat Cruz, decana da Facultade de Ciencias Empresariais e Turismo.