O programa de doutoramento do Campus Auga achégase aos 90 estudantes

O Campus Auga, o proxecto de especialización do campus de Ourense arredor dos recursos hídricos financiado pola Xunta de Galicia, celebrou este mércores as conferencias inaugurais do seu Programa de Doutoramento Auga, Sustentabilidade e Desenvolvemento. Coa incorporación este curso académico de 10 investigadoras e investigadores, estes estudos contan xa con arredor de 90 persoas preparando as súas teses de doutoramento.

As conferencias, coas que se deu arranque oficial á programación 2023/2024 deste doutoramento, afondaron na relación da auga co clima, tratando de profundar na xestión territorial necesaria para un maior aproveitamento do recurso da auga ante un clima cambiante, e tamén sobre as posibilidades de coñecer o noso clima pasado a través da recuperación de datos históricos a partir de diferentes tipos de documentación. Sergio Vicente, profesor de investigación no Instituto Pirenaico de Ecoloxía (CSIC), falou de Cambios na dispoñibilidade de auga en España: a influencia da xestión do territorio e as demandas de auga nun escenario de cambio climático. Pola súa banda, Fernando Domínguez, investigador da Fundación ARAI na Universidad de Zaragoza, ofreceu o relatorio Que nos contan os arquivos e bibliotecas da variabilidade climática? Ao acto, que puido seguirse on line a través de UVigo TV, contou coa asistencia, entre outros de Roberto Ignacio Fernández, director do Campus Auga; Francisco Javier Rodríguez Rajo, vicerreitor do campus de Ourense; Raquel Nieto, directora do  Programa de Doutoramento en Auga, Sustentabilidade e Desenvolvemento; Emma González, xerenta do Inorde (Deputación de Ourense) e Carmen Sampayo, presidenta do Colexio de Economistas de Ourense.

Un programa “único”

O Programa de Doutoramento en Auga, Sustentabilidade e Desenvolvemento arrancou no curso 2017/2018 no campus de Ourense, dentro da Escola Internacional de Doutoramento da UVigo. A titulación constitúe unha das liñas de orientación estratéxica do Campus Auga e preséntase como un programa único no Sistema Universitario Galego. O seu deseño aposta por consolidar “unha oferta formativa diferenciada e especializada nas temáticas propias do Campus Auga (alimentación, medio ambiente e xestión da auga), que promova a capacitación integral de profesionais, conectada coas demandas da contorna máis próxima, e que sexa valorada socialmente”. Para acabalo, ten a colaboración multidisciplinar das escolas e facultades do campus de Ourense e de universidades e institutos universitarios do Norte de Portugal, como son o Instituto Politécnico do Porto, a Universidade de Tras-os-Montes e Alto Douro e o Instituto Politécnico de Bragança. Os obxectivos formativos desta titulación están artellados en once liñas de investigación soportadas por 24 grupos de investigación, cinco deles pertencentes a centros de investigación.

Cada curso académico oferta 25 prazas, sendo o perfil do alumnado moi diverso, cubrindo a maior parte de todos os ámbitos de coñecemento, de acordo co carácter multidisciplinar e transversal desta titulación. Este curso académico son dez as persoas matriculadas de novo ingreso (cinco de España, catro de Portugal e unha de China), que investigarán arredor do réxime xurídico do medio ambiente e a súa sustentabilidade; a calidade da auga e os seus ecosistemas; o réxime xurídico da auga e, de xeito destacado, sobre alimentación e desenvolvemento e sobre cambio climático e recursos hídricos. Esta decena únese ás arredor de 80 persoas que a finais do curso pasado estaban matriculadas neste programa de doutoramento, situándose a cifra total en 90. No conxunto, os datos por procedencia amosan que a metade das persoas matriculadas son estranxeiras, procedendo na súa maior parte de Portugal.