O programa DUE apoia 15 deportistas de elite que estudan na universidade
Ofrecéndolle facilidades para compaxinar a vida académica coa competición
Nomes tan coñecidos como Javier Gómez Noya ou Santi Pérez forman parte, como estudantes da Universidade de Vigo, do programa DUE, de apoio a deportistas de elite. Xunto con eles, outros trece atletas de alto nivel pertencen a esta iniciativa da institución para que os deportistas poidan compatibilizar os seus estudos coa actividade física.
Posto en marcha no curso 2005-2006, neste ano académico a Facultade de Ciencias da Educación e do Deporte de Pontevedra é o centro con máis alumnos nesta iniciativa, onde estudan catro dos quince deportistas.
No que se refire ás modalidades, destaca por riba de todas o triatlón. Xunto con Gómez Noya, outros dous triatletas están inscritos no programa DUE. Modalidades como taekwondo, atletismo e vela contan con dous representantes e completan o grupo un xogador de hockey sobre patíns, de rugby, de natación, de baloncesto, de piragüismo e un ciclista.
Atendendo aos campus, nove dos deportistas son estudantes do campus de Vigo, cinco do de Pontevedra e un de Ourense.
Un programa de apoio aos deportistas
O programa DUE é unha aposta da Universidade para que os deportistas de elite poidan compatibilizar os seus estudos coa actividade deportiva. Trátase así de facilitar, como se recolle nos Estatutos da Universidade, a aprendizaxe dos estudantes e a obtención dos títulos académicos mediante a impartición dunha formación axeita, nestes caso de acordo á condición de deportista de alto nivel.Esta iniciativa establece unha serie de medidas encamiñadas á compatibilización dos estudos coa práctica deportiva mediante, principalmente, a creación da figura dun titor personalizado para cada atleta. Trátase de ofrecerlles así un apoio no ámbito académico que actúa tamén como intermediario entre o estudante o os docentes. Facilítase, deste xeito, a modificación de horarios de prácticas ou seminarios e a adaptación do calendario de exames atendendo a adestramentos e eventos deportivos de alta competición que afecten ao alumno.
Entre as funcións do titor, ademais de exercer de interlocutor cos outros docentes para estas modificacións, está orientar ao estudante á hora de matricularse e elixir a carga docentes compatible coa carga deportiva. Por outra banda, o profesor elixido para exercer esta función debe realizar un seguimento continuado da actividade académica do deportista mediante un réxime de titorías e realizar un informe final onde se recolla unha valoración global dos resultado do programa de titorización.
Estudantes e atletas
Para beneficiarse destas prestacións docentes do programa DUE é preciso cumprir requisitos tanto a nivel académico como deportivo. Para formar parte desta iniciativa os estudantes deben estar matriculados nun mínimo de 30 créditos de calquera escola ou facultade da Universidade de Vigo e para permanecer no programa, o alumnos deberá superar, polo menos, 20 destes créditos no curso académico.A nivel deportivo requírese figurar na relación de Deportistas de Alto Nivel no ámbito estatal ou autonómico ou ben ter sido convocado por unha selección nacional para participar nunha competición