Diario da Universidade de Vigo
A bolsa vai dirixida a estudantes de ciencias e enxeñaría
Programa Vulcanus: destino, Xapón
Os interesados poden presentar as solicitudes ata o vindeiro 11 de xaneiro
Realizar prácticas preprofesionais en Xapón é posible grazas a unha nova edición do programa Vulcanus. Dende a súa creación no ano 1997, esta iniciativa está pensada para ensinar ao estudantado de ciencias e das diferentes ramas da enxeñaría o abano de avanzadas tecnoloxías utilizadas polas empresas do país de acollida, así como a cultura e a lingua niponas. Deste xeito, “facilítase que os futuros profesionais adquiran a experiencia necesaria para estreitar lazos e interactuar con empresas e cidadáns xaponeses ao longo da súa vida laboral”, indica Eva Garea, técnica superior de Relacións Internacionais.
Ademais, e co fin de facilitar a súa integración no país de destino, os seleccionados tamén participarán nun seminario dunha semana de duración no que recibirán toda a información sobre Xapón, así coma un curso intensivo do idioma de catro meses de duración.
Os interesados poderán presentar as solicitudes na Oficina de Relacións Internacionais ata o 11 de xaneiro de 2013.
Requisitos dos candidatos
As prácticas ofertadas durarán un ano académico, adaptándose ao calendario europeo para cubrir as necesidades do alumnado participante. Os candidatos á bolsa de prácticas terán que ser cidadáns da Unión Europea e estar matriculados como mínimo no terceiro curso de carreira nunha universidade de Europa que recoñeza a posibilidade de estudar un ano no estranxeiro. As áreas prioritarias son Enxeñaría Informática, Científica, Química, Mecánica, Electrónica, Física, Telecomunicación, Nuclear, Civil, Metais, Cerámica ou Sistemas de Produción. Á hora de facer a selección, “tomarase coma base o seu expediente académico e a opinión dos titores, o coñecemento escrito e falado da lingua inglesa e a súa capacidade para adaptarse a unha cultura diferente”, puntualiza Garea facendo referencia ás bases da convocatoria.Ademais, e co fin de facilitar a súa integración no país de destino, os seleccionados tamén participarán nun seminario dunha semana de duración no que recibirán toda a información sobre Xapón, así coma un curso intensivo do idioma de catro meses de duración.
Financiamento da bolsa
O programa está financiado polo centro UE-Xapón para a Cooperación Industrial e polas empresas xaponesas onde realicen as prácticas os seleccionados. Os estudantes reciben unha bolsa para cubrir os gastos tanto da viaxe coma da vida no país de destino. O curso de inmersión lingüística e o seminario non supoñen ningún custo a maiores e o aloxamento proporciónase de forma gratuíta durante todo o período de prácticas.Os interesados poderán presentar as solicitudes na Oficina de Relacións Internacionais ata o 11 de xaneiro de 2013.