O proxecto de reforma da cuberta da ETSEI, recoñecido a nivel europeo

A reforma da cuberta da Escola Técnica Superior de Enxeñaría Industrial e o sistema de colocación dunha instalación solar térmica nesta mesma localización valeulle a Alejandro Martínez, arquitecto técnico da Unidade Técnica da Universidade quedar finalista no certame europeo O aluminio na renovación, cuxa cerimonia de entrega tivo lugar na sede do Parlamento Europeo.
Martínez foi un dos dous candidatos españois que competiu na final europea dun certame no que os edificios gañadores amosan que o aluminio na construción é unha solución sostible. Con carácter bianual e outorgado pola Asociación Europea do Aluminio (EAA) de Bruxelas, en estreita colaboración co programa Aluminio para as xeracións futuras e as diferentes organizacións nacionais do sector do aluminio en Europa, Martínez salienta que é “unha satisfacción e un orgullo enorme, pasar a selección a nivel nacional e chegar á final europea dun certame destas características”.

Unha solución sostible coa que se eliminaron os problemas de filtración de auga

O proxecto, que consistiu na rehabilitación da cuberta do edificio mediante bandexas perfiladas de aluminio e na posterior colocación da estructura portante para unha instalación solar térmica, reúne unha serie de características que amosan que o aluminio é unha boa solución para cumprir cos requisitos de eficiencia enerxética, ciclo de vida, impacto socioeconómico e valor engadido ao deseño orixinal.
Segundo o arquitecto vigués, a produción e extracción do aluminio co seu correspondente esgotamento de recursos naturais e enerxéticos deberá estar plenamente xustificado cun análise exhaustivo do ciclo de vida. “Evidentemente a dunha lata de aluminio non é o mesmo que o dunha cuberta realizada no mesmo material. Polo xeral, no ámbito da construcción as propostas de uso de aluminio teñen que ver coas enormes virtudes que presenta o material”, engadiu.
Como exemplo da durabilidade deste material, Martínez menciona o caso da cúpula da Igrexa de san Gioacchino, o edificio que ten a aplicación máis antiga en aluminio que se coñeza, “dito recubrimento data do ano 1897 e na actualidade conserva un moi bo estado, pese a que o aluminio empregado nesas datas dista das esixentes normas de calidade actuais”.

Innovador sistema de ancoraxe

Ademais do emprego de aluminio, o xurado valorou tamén o carácter innovador do proxecto, sobre todo no que se refire ao deseño dun innovador sistema de ancoraxe. “Empregamos para a suxeición da estrutura portante dos paneis solares un sistema de abrazadeiras de presión a modo de ancoraxe nos engatillados da bandexa de aluminio que evitan a perforación da cuberta”, sinalou o arquitecto técnico vigués a medida que explicaba o gran avance que supón esta técnica para evitar filtracións futuras.
Para o arquitecto técnico vigués a lista de aspectos favorables de empregar este sistema construtivo non remata aquí, xa que é importante sinalar tamén que supón unha clara revalorización da cuberta, xa que achega unha garantía ante os axentes meteorolóxicos. “Ademais de que se garante o control das condensacións no inmueble grazas á barreira de vapor e se mellorou notablemente o illamento acústico do edificio”, engadiu.
Doutra banda, sinala o feito de que a nova envolvente permite o aforro de enerxía impedindo a perda térmica grazas ao illamento de lana de roca baixo o aluminio, “esta cuberta de aluminio tamén permite a diminución dos labores de mantemento a curto e longo prazo”.
A última fase do proxecto, consiste en colocar na estructura portante de 1000 metros cadrados sobre a cuberta de aluminio unha instalación solar térmica experimental formada por 16 paneis solares que xeran una potencia térmica de 50 Kw, o que permite subministrar auga quente a 100ºC no circuito primario e tamén se poderá empregar a instalación para apoio da calefacción durante o inverno.

Un experto na historia do Casco Vello vigués

Alejandro Martínez compaxina o seu traballo na Unidade Técnica da Universidade, onde leva a cabo proxectos coma o finalista deste certame, con outro tipo de actividades. Entre outras cabe destacar a publicación o ano pasado do libro Vigo, de la antigua ciudad amurallada al casco viejo actual no que a través de sete capítulos repasa as posibilidades de rehabilitación que ten esta zona da cidade da que el se sinte “un apaixonado”.