'Psiconautas' pechou unha das edicións máis concorridas de Augal

Co Goya que hai poucos meses gañaba pola súa longametraxe de animación Psiconautas, Alberto Vázquez retornou na tarde deste mércores ao campus de Pontevedra para protagonizar a última sesión da sexta edición de Augal. Promovida polos profesores da Facultade de Ciencias Sociais e da Comuniación Miguel Anxo Fernández, Fortunato Rodríguez e Paulino Pérez, co patrocinio da Axencia Galega das Industrias Culturais (Agadic), a sexta edición desta Máster Class Audiovisual Galego contou con preto de 140 estudantes matriculados, unha das participacións máis elevadas dunha iniciativa que, tralo coloquio con Vázquez, despediuse ata o vindeiro curso cunha entrega de diplomas.

O vicerreitor do campus, Juan Manuel Corbacho, quen destacou a presenza na programación deste ciclo de ex-estudantes da Universidade, como o propio Vázquez, e o director da Agadic, Jacobo Sutil, quen manifestou o apoio da axencia para lograr “unha sétima edición cunha programación semellante e mellor”, participaron xunto a Rodríguez e a profesor Luis Fernández nesta entrega de diplomas. Previamente, os e as participantes na sesión participaran nun coloquio no que Vázquez relatou o proceso de creación de Psiconautas, “realizado cun equipo de arte formado por só tres persoas”, e a importancia que tivo no seu labor na animación “a experiencia previa no mundo do cómic”, que foi onde naceu precisamente, hai preto dunha década, a historia que neste 2017 se alzaba co premio Goya.

Previamente, Augal tamén achegara a Ciencias Sociais e da Comunicación ao director Ignacio Vilar, quen presentou o seu filme Sicixia; aos produtores da premiada María (y los demás), Luisa Romero e Sergio Frade; á directora e o guionista de Migas de Pan, Manane Rodríguez e Xabier Bermúdez, e ás realizadoras Olga Osorio, Diana Toucedo e Lucía Estevéz, protagonistas da sesión dedicada ás curtametraxes.