A súa figura e obra centran o V Congreso Internacional Roa Bastos de Literatura
Rafael Barrett, un español que revolucionou o panorama cultural paraguaio a comezos do século XX
Ata o vindeiro venres Vigo acollerá tres intensas xornadas de conferencias e debates
Descoñecido para a meirande parte do público, Rafael Barrett, autor polifacético nacido en Torrelavega hacia 1870, converteuse tras a súa chegada a Paraguai a comezos do século XX nun revolucionario do pensamento do país que deu lugar a unha modernidade artística fundamental na súa evolución cultural. Esta é unha das razóns polas que Barrett protagoniza a quinta edición do Congreso Internacional Roa Bastos de Literatura que por primeira vez se celebra en Vigo, “algo moi salientable que hai que agradecer a Carmen Luna, profesora da Universidade, e á investigadora brasileira Alai Diniz”, subliñou Rosa Pérez, decana da Facultade de Filoloxía e Tradución, que se mostrou encantada de que eventos deste nivel se celebren en Vigo.
Á súa chegada a Paraguai en outubro de 1904, Rafael Barrett non era aínda consciente de que acababa de atopar o seu lugar definitivo no mundo e de que chegaría a converterse no descubridor da realidade social do país, así como nun “escritor de altísimos quilates, tal como se empeza a recoñecer hoxe”, segundo explicou Miguel Ángel Fernández, profesor da Universidade de Asunción, ao longo da conferencia inaugural. O certo é que tras unha etapa na que a súa obra caeu no olvido, o autor paraguaio Roa Bastos, galardoado en 1989 co premio Cervantes, “recuperou a figura de Barrett reivindicando o seu compromiso social e o súa importancia na creación da narrativa do país latinoamericano”, apunta a profesora Carmen Luna, organizadora das xornadas.
Pese á súa orixe aristocrática, Barrett optou por dedicar a súa vida á defensa dos oprimidos e dos explotados a través dunha obra divulgada principalmente a través dos xornais da época, posto que só chegou a publicarse un dos seus libros. En 1908, logrou reunir datos necesarios para denunciar as condicións de vida esclavistas que se daban nos campos de mate do país o que “lle acarreou numerosos problemas, chegando as autoridades a prohibirlle falar do tema”, tal como sinalou Fernández. A partir deste momento tivo que usar o panfleto como medio para expresar o seu pensamento, gañándose o desprezo dos intelectuais da época e a expulsión a Brasil. En definitiva, “culto e sensible, home de coraze, Barrett non ceseu no seu empeño de denunciar a miseria das clases explotadas para reivindicar a igualdade social e a mellora das condicións de vida”, conclúe Fernández.
Homenaxe a Roa Bastos
A orixe deste congreso sitúase no ano 2005, coincidindo co pasamento de Roa Bastos. O autor estaba convidado por Alai Diniz, profesora da Universidade Federal de Santa Catarina, a asistir a un simposio sobre literatura hispánica, pero “motivos de saúde fixeron imposible que acudise e para desculparse escribiu unha carta na que instaba a manter unha colaboración constante entre os países latinoamericanos para traducir as obras do portugués ao guaraní ou ó español e viceversa”, segundo palabras da investigadora brasileira, que decidiu pór en marcha o congreso como unha homenaxe ao escritor falecido.Partindo deste punto, a traxectoria itinerante de Bastos fai que sexa obrigado que en cada unha das súas edicións, o evento se traslade a diferentes puntos, tocándolle o turno para o ano vindeiro á Amazonia.