Rallie de Ourense, xogos olímpicos e mundial de fútbol, algúns dos temas do curso "Deporte, empresa e sociedade"
Celebrarase os vindeiros 27, 28 e 29 de outubro na Facultade de Ciencias Empresariais e Turismo
Temas tan variados como son o impacto económico do rallie de Ourense, a figura de Pep Guardiola, a organización dos xogos olímpicos de Pekín e o mundial de fútbol de Sudáfrica serán os protagonistas do curso de extensión universitaria Deporte, empresa e sociedade: impacto económico-turístico dos eventos deportivos, que os vindeiros 27, 28 e 29 de outubro se desenvolverá na Facultade de Ciencias Empresariais e Turismo.
“O que destaca nesta edición é o alto nivel dos dezaseis convidados cos que contaremos”, explica o profesor Patricio Sánchez, director do curso, que engade que “a relación de poñentes é salientable, tanto pola súa calidade como pola cantidade e a variedade”.
Representantes do ámbito académico, profesional e político
A nivel académico, ademais de docentes da propia Universidade, participarán catedráticos de economía doutras institucións educativas, tanto nacionais como internacionais. “Destaca a presencia de Sean Hamil, director da escola de deportiva da Universidade de Birkbeck, en Reino Unido”, explica Sánchez.O eido profesional, pola súa banda, estará representado por José García Cota, médico do Celta e da selección española de fútbol, que disertará sobre a preparación do deportista de élite para as grandes competicións, tomando como referencia o pasado mundial celebrado en Sudáfrica. “O último confirmado é un dos máximos responsables de ING Consulting, a empresa que máis eventos deportivos organiza a nivel mundial”, apunta Sánchez.
Por último, do ámbito político procede José Ramón Lete, secretario xeral para o deporte da Xunta de Galicia, que ademais será o encargado de inaugurar as xornadas cun relatorio titulado A dimensión económica do deporte.
Para pór o punto final ao curso, durante a tarde do venres 29 desenvolveranse actividades prácticas de carácter turístico-deportivo. “Faremos unha ruta de sendeirismo e compartiremos cea en Montederramo”, conclúe Sánchez.