Outorgado pola Asociación de Empresarios Gallegos de Cataluña
O reitor recollerá este venres en Barcelona o Título de Excelencia Galega
Salustiano Mato foi galardoado na categoría de Ciencias e Medicina
O reitor da Universidade de Vigo, Salustiano Mato, recibirá estes venres o torque que o acredita co merecedor do Título de Excelencia Galega 2011. Esta distinción, outorgada pola Asociación de Empresarios Gallegos de Cataluña, recoñece a aquelas persoas que coa súa traxectoria persoal e profesional e polo seu amor a Galicia, teñan contribuído ao seu engrandecemento e desenvolvemento.
A finalidade é recoñecer o traballo e esforzo de galegos e non galegos por poñer en valor a terra galega dende os seus diversos campos de coñecemento, dende a política, a economía e a empresa ata as artes, a cultura, o deporte e a solidariedade. O recoñecemento a Mato corresponde á modalidade de Ciencias e Medicina, “pola súa traxectoria profesional como investigador no campo da bioloxía e a faunística das miñocas de Galicia e polo orgullo que ten demostrado polas súas orixes galegas”.
Xunto con Salustiano Mato reciben estes galardóns na edición de 2011 o pintor Antón Lamazares na categoría de Artes; Tomás Pérez Vidal, presidente do Parlamento de Galicia entre 1986 e 1989, en Ciencias Políticas; o presidente do grupo La Región, José Luis Outeiriño na modalidade de Comunicación; Antonio Fernández López, director xeral de Ahorro Corporación, en Finanzas; a alpinista Chus Lago en Deportes; a Xestión do Plan Xacobeo na modalidade de Restauración y Turismo e a Fundación María José Jove en Acción Solidaria.