Remata o prazo de preinscrición para a terceira edición do Curso de Loxística do Transporte Marítimo

Este mércores, 4 de febreiro, remata o prazo de inscrición no Curso de Loxística do Transporte Marítimo que, nesta terceira edición consolídase como un óptimo complemento de formación tanto para profesionais como para estudantes universitarios. Segundo os seus organizadores, Francisco José Torres e Raquel Díaz, dos departamentos de Dereito Privado e de Fundamentos de Análise Económica, Historia e Institucións Económicas, trátase de paliar unha carencia formativa neste eido tan importante para o desenvolvemento económico e territorial de toda a costa galega.
A pesar de estar orientado principalmente a profesionais do sector e a estudantes de titulacións vencelladas ao dereito, a economía e as empresas, segundo Torres “nas anteriores edicións amosaron o seu interese por este curso estudantes do campo das enxeñarías”, xa que supón unha importante oportunidade para todos eles de completar os seus coñecementos de todas as áreas relacionadas coa loxística do transporte por mar.

Dez módulos e cen horas de docencia

Con dez módulos centrados en cuestións tanto xurídicas como económicas, este curso pretende ofrecer unha visión ampla, práctica, especializada e actualizada dos principais aspectos relacionados coa loxística e o transporte por mar. Esta terceira edición ofrece 30 prazas así como máis horas lectivas e prácticas, asentándose no éxito destas edicións anteriores. Como iniciativa formativa e de reciclaxe, o curso conta cun total de cen horas de docencia, o curso está dividido nun programa de dez módulos. Os dous iniciais son os máis xenéricos, o primeiro está dedicado a coñecer o principal obxecto da navegación que é o buque. O segundo módulo, tamén introdutorio, explica o medio no que se desenvolve a actividade, o medio portuario. Os oito seguintes son unha combinación de materias variadas que inclúen cuestións económicas do transporte marítimo, a dirección das empresas marítimas, o transporte marítimo, o transporte terrestre, o transporte de contedores, o comercio exterior, as cuestións xurídicas do transporte marítimo e as cuestións xurídicas relativas ao seguro.
Para impartir estes módulos, ademais de profesorado da Universidade, o curso contará coa colaboración de expertos e profesionais de estaleiros, do Porto de Vigo, consignatarias, asociacións ou aseguradoras.
Paralelamente, explica Torres “os estudantes realizarán visitas a estaleiros e aos portos de Vigo, Marín-Pontevedra e Leixoês, dentro das actividades programadas nas 56 horas de docencia práctica, que nesta edición superan ás horas teóricas”. Ademais, os alumnos realizarán análises documentais e casos prácticos cos que se achegarán dun xeito directo á realidade do sector.

Prazos de matrícula

A preinscrición, que se cerra este mércores 4 de febreiro, debe realizarse a través da plataforma Bubela, mentres que a matrícula poderase facer efectiva entre o 5 e o 12 deste mes. No que se refire á docencia, as clases comezarán o 13 de febreiro e rematarán o 22 de maio os venres pola tarde e os sábados pola mañá na sede da Cámara de Comercio, Industria, Navegación de Vigo. Segundo Torres, estas datas son as idóneas “sobre todo para os estudantes da Universidade, xa que non coinciden cos períodos de exames nin do primeiro nin do segundo cuadrimestre”.
Para os seus organizadores, outra das vantaxes do curso é o seu custe. Segundo salienta Torres “ten un prezo público, 400 euros, moi inferior a outros cursos deste tipo, que adoitan estar arredor dos 1000 euros cando a formación é virtual e cun prezo moi superior se é presencial”. Ademais, a Universidade de Vigo pon a disposición dos seus estudantes interesados en matricularse, cinco bolsas de 100 euros e co curso poderán validarse 6.5 créditos de libre configuración.