O Barrio Xudeu e o Castelo de Ribadavia cruzaranse no camiño dos aventureiros
O Ribeiro é o espazo protagonista da Ruta Cultural desta fin de semana
A xornada rematará cunha cata de viños
Comeza o ano e con el voltan a Rutas Culturais. Todos aqueles que se fixeron o propósito de facer deporte e coñecer un pouco máis a contorna histórica e cultural de Galicia teñen unha boa oportunidade apuntándose a ruta do Ribeiro que terá lugar este sábado día 10. O itinerario levará aos participantes a coñecer Leiro e Ribadavia, pasando por Gomesende, o río Avia, San Cibrao e San Clodio. Esta primeira ruta do ano servirá aos participantes para coñecer as zonas onde se produce o viño coa denominación de orixe de O Ribeiro, “baluarte da provincia ourensá”, comentou dende a organización José García-Calvo. Pero grazas a ruta tamén coñecerán o Barrio Xudeu e o castelo de Ribadavia, o mosteiro de San Clodio e gozarán das “estupendas vistas, se o día está claro, que ofrece o miradoiro de San Cibrao”, explicou García-Calvo.
A distancia do percorrido é de 15 quilómetros e a dificultade media, “case todo o percorrido é suave, agás un pequeno tramo que ten pendente”, dixo o organizador. Os participantes deberán levar, como é habitual, o seu xantar pero tras el agárdaos unha cata de viños “en toda regra e de xeito profesional” que terá lugar en Ribadavia. Ao remate das actividades cada quen regresará cara o seu destino nos autobuses habilitados pola Universidade de Vigo.
A pesar da interrupción que supuxeron as vacacións de Nadal e de que os exames xa se atopan preto, os estudantes colleron con ánimo a volta ao curso. Contando os tres campus, son 85 os inscritos para participar nesta ruta, número que segue facendo preciso empregar dous autobuses, un por cada provincia.