Rutas en bici pola contorna do campus para achegarse á natureza sobre dúas rodas

Con dúas rutas marcadas pola contorna do campus, o Servizo de Deportes da Universidade pretende achegar a comunidade universitaria ao exercicio físico no medio natural. Para isto, establecéronse dous percorridos polos arredores do campus vigués con diferente lonxitude e dificultade, de xeito que se adapten a todos os perfís. Trátase dunha alternativa de ocio que permite coñecer os montes de Bembrive e Beade mentres se pedalea nun medio natural que, a pesar de estar moi preto, para moitos é descoñecido.
Con todo e a pesar destas facilidades, o Servizo de Deportes tamén pon a disposición de todos aqueles que non teñen bicicleta un programa de préstamo aberto a toda a comunidade universitaria.

Dúas rutas e dous niveis

Dende a rotonda próxima ao edificio do Servizo de Deportes saen dous percorridos sinalizados e delimitados con estacas de colores. O primeiro deles, cunha lonxitude de 5,4 quilómetros, é de dificultade media-baixa, mentres que o segundo, de 3,5 quilómetros, ten unha dificultade baixa.
Os percorridos e gráficas de ambos roteiros están dispoñibles na web do Servizo de Deportes.

Préstamo de bicicletas

Ademais de ofrecer estas rutas establecidas, o Servizo de Deportes ofrece dende o pasado curso un programa de empréstito de bicicletas de montaña para todos aqueles que carezan deste medio. Para solicitar unha bici é preciso ser membro da comunidade universitaria e darse de alta no programa, de xeito que, cada vez que se solicite un préstamo unicamente haberá que cubrir un ficha co horario e o percorrido. Cun máximo de dúas horas por usuario, este servizo está dispoñible todos os días de semana, de acordo co horario do Pavillón de Deportes.