Saír da Universidade cun proxecto empresarial debaixo do brazo

Tras abandonar as aulas, os mozos e mozas lánzanse a buscar traballo sen contemplar outras saídas, como “a de converterse no propio xefe”. Co obxectivo de fomentar o autoemprego entre o alumnado universitario, naceron as Xornadas de Emprendemento nas Industrias Culturais, organizadas polas consellerías de Educación e Ordenación Universitaria e Traballo e Benestar en colaboración coas tres universidades galegas. O encontro, que tivo lugar este xoves na Facultade de Ciencias Sociais e da Comunicación, achegou ao alumnado as posibilidades empresarias da industria cultural, “un nicho de mercado emerxente en Galicia e o que mellor está a resistir a crise, xa que dá emprego a máis de 17.000 persoas e constitúe o 2% do PIB galego”, explicou Amparo González Méndez, directora xeral de Promoción do Emprego da Consellería de Traballo e Benestar, que inaugurou as xornadas.

Tras celebrarse este mércores na Universidade de A Coruña, o encontro chegou hoxe ao campus pontevedrés para amosar aos futuros titulados e tituladas a capacidade xeradora de emprego das industrias culturais, unha importante opción “a ter en conta” para o futuro laboral, sobre todo nos eidos converxentes con este sector, como é o da comunicación. A vicerreitora do campus, Antonia Blanco, aproveitou o acto de apertura das xornadas para pór en valor este tipo de iniciativas formativas promovidas pola Xunta de Galicia, “que informan aos nosos estudantes dos nichos de traballo posibles, como o emprendemento, unha saída laboral moi válida e interesante”, sinalou. Por outra banda, a vicerreitora tamén destacou a importancia de que o alumno coñeza o seu campo profesional antes de rematar o período formativo e, "dende a Universidade temos que cubrir esa necesidade da que o estudante non se dá conta ata que chega o momento de enfrontarse á realidade”.

Posta en valor das industrias culturais

As xornadas, ademais de impulsar o autoemprego entre os máis novos, teñen como obxectivo “pór en valor” as industrias culturais en Galicia. “Aínda que estamos a falar dun sector que concentra máis de 3000 empresas, hai moitas persoas que non o coñecen, polo que temos a obriga de trasladar á sociedade o peso que xoga na economía galega, ademais de ser un elemento vehicular que exhibe a nosa cultura no exterior”, apuntou a directora xeral. Nesta idea tamén afondou Francisco Javier Alonso González, director da Fundación Illa San Simón, que foi o encargado de abrir a quenda de relatorios. Destacou que unha das principais desvantaxes de emprender novas iniciativas ao abeiro das industrias culturais é a falta de comprensión por parte da cidadanía xa que “non hai unha conciencia xeral de que a industria da cultura é un motor económico importante”. Non obstante, animou aos futuros titulados e tituladas a “aventurarse” cun proxecto innovador, pois “esixe un baixo investimento económico, sendo máis importante o talento e a rede de contactos a través da cal promocionar a idea”.

Ademais de ter a oportunidade de conversar con profesionais que compartiron a súa experiencia empresarial, as xornadas tamén convidaron a técnicos e responsables da Axencia Galega das Industrias Culturais, Agadic, que explicaron ao alumnado os pasos necesarios para presentar na administración un proxecto empresarial, achegándolle información práctica a nivel xurídico e económico relacionada coas axudas dispoñibles, créditos, tramitacións e demais cuestións burocráticas. “Esta vertente práctica do encontro móstralle ao titulado que emprender é unha alternativa máis a ter en conta no momento de rematar os estudos”, apuntou Juan Manuel Corbacho, decano da Facultade de Ciencias Sociais e da Comunicación.

Estas xornadas sobre emprendemento terán continuidade na Universidade de Vigo. O vindeiro 26 de abril trasladaranse ao campus de Ourense, en concreto á Facultade de Ciencias Empresariais e do Turismo para mostrar as oportunidades laborais das industrias culturais no eido do turismo.