Últimos días para visitar a exposición ‘Soy tan loser que ni los feos me quieren’ na Sala X
Seis miradas diferentes plasman a vida e a morte nunha única obra
Trátase dun debuxo de grandes dimensións realizado por artistas da Facultade de Belas Artes
Son dúas constantes na historia da arte, pero cada vez contadas desde ópticas diferentes. A vida e a morte fanse presentes na exposición Soy tan loser que ni los feos me quieren, aberta ata o 15 de xullo na Sala X. Seis artistas novas que teñen en común a súa formación universitaria na Facultade de Belas Artes e a súa paixón polo debuxo, foron quen de renunciar ao seu individualismo “para crear unha obra colectiva sen igual feita conxuntamente a seis mans, un proxecto artístico irrepetible pero efémero”, explica o profesor Nono Bandera, comisario da mostra.
Sae Aparicio, Natalia Blanco, Inés Casarejos, Tamara Feijoo, Elena Fernández e Sara García foron quen de plasmar nun gran debuxo de 9 metros de longo por 2,40 metros de ancho as súas inspiracións artísticas, “onde o resultado non é unha unión de imaxes tras repartirse un recuncho de parede, senón que foi un proxecto feito con corazón, con intelixencia, con xenerosidade, no que as individualidades se pregaron para que o resultado final fose un debuxo fresco, directo e cargado de emoción”. A pesar da distancia xeográfica que separaba ás artistas, internet foi a ferramenta que as mantivo unidas mediante o emprego do cadáver exquisito, unha técnica de creación colectiva surrealista na que a imaxe vai sendo transformada en cadea por distintas mans, “proceso no que se van incorporando novas ideas, distintas caligrafías e diferentes estilos, pero todo moi ben harmonizado”.
A pesar do carácter perecedoiro da obra, “pois naceu para un espazo concreto”, as seis artistas e Nono Bandera idearon a peza de tal xeito que unha vez desmontada “se poidan conservar pequenas pezas, como aconteceu co Muro de Berlín”. Así mesmo realizaron un vídeo de oito minutos baixo a técnica do stop motion “que recolle o proceso de elaboración, de produción e de montaxe da peza, e que amosa o intenso traballo de máis dunha semana”.
Un bosque “sinistro”
O resultado da inspiración é un bosque no que todo semella familiar e próximo, coa representación dunha merenda campestre, pero que ten unha lectura sinistra coa representación dunha mantis relixiosa, “fálica, fascinante, devoradora e sobredimensionada”, que achega esa intranquilidade. Téntase plasmar “unha paisaxe na que suceden cousas, que recolla as vivencias persoais, o mundo coas súas alegrías e tristezas, cos seus momentos bos e malos, igual que pasa nas carreiras artísticas”.Nesta mostra obsérvase que para as seis artistas o debuxo é un proxecto en si mesmo, un medio de experimentación e de comunicación, “superando as ensinanzas de antes, nas que inculcaban que o debuxo era simplemente unha ferramenta de aprendizaxe”, aclara Bandera. O título da exposición, Soy tan loser que ni los feos me quieren, xoga coa mestura da ironía e do humor, “dando a entender que somos tan perdedores que ninguén se quere achegar a nós”, cuestión que contrasta, engade, “co currículo enorme das seis artistas, que a pesar da súa xuventude, moitas delas xa teñen exposto en feiras e circuítos internacionais de prestixio”.
O certo é que o tamaño do debuxo está a chamar moito a atención da cidadanía, “e sobre todo dos máis pequenos que o observan pola ventá e se animan a entrar para contemplar de preto a calidade da obra”.