Un sentido adeus ao avogado ourensán que deu pulo ao Consello Social da Universidade

Como un excelente profesional e como unha gran persoa. Deste xeito, lembraban este venres na Universidade de Vigo a Emilio Atrio, o avogado ourensán que durante oito anos, ata 2011, foi o presidente do Consello Social desta institución. O seu falecemento aos 82 anos de idade na cidade das Burgas foi unha triste noticia para todos aqueles que durante a última década compartiron con el amizade, moitas hora de traballo en prol dun ensino superior de calidade e un gran esforzo por estreitar os lazos dos campus universitarios coas cidades e provincias nas que están presentes.

Recoñecemento profesional e humano

“Hoxe é un día moi triste para o Consello Social da Universidade de Vigo e para min persoalmente, porque me unía a Emilio Atrio unha grande amizade persoal de moitos anos. Na súa memoria só podemos ter palabras de recoñecemento e agradecemento á súa figura”, comentou Ernesto Pedrosa, actual responsable do Consello Social. Atrio, apuntou, foi “un excelente presidente, que soubo delegar moito nas persoas que formaban parte da institución, que tivo sempre un talante consensuador e que impulsou o Consello Social da Universidade de Vigo ata cotas moi altas”.

A labor de Atrio ao fronte do Consello Social, indicou o seu actual presidente, “quedará sen dúbida para sempre na memoria e no recordo de todos nós e desta institución”. Alén da labor profesional do avogado ourensán, Ernesto Pedrosa gabou especialmente os valores que como persoa tiña Emilio Atrio. “Eu seguín os seus pasos, ocupando ao longo dos anos cargos como vicepresidente, presidente de comisións, etc. ata sucedelo en 2011 e só podo dicir que era unha persoa entrañable, cariñosa, moi profesional e excepcional en todos os sentidos”, subliñou.

Neste perfil humano e profesional, Virxilio Rodríguez, vicerreitor do campus de Ourense, quixo destacar que “estar ao fronte de órganos destas características, que buscan a participación da universidade na sociedade e viceversa, require ser un home social, ter un trato afable e achegado, como era o caso de Emilio Atrio”. Salientando o empuxe que tivo o Consello Social da Universidade durante os anos de mandato do avogado, o vicerreitor quixo tamén lembrar a dedicación de Atrio ao seu cargo, unha dedicación constatable nas numerosas actividades que apoiou coa súa presenza ao longo dos anos que estivo ao fronte da institución universitaria.

Unha longa traxectoria

Emilio Atrio presidiu o Consello Social da Universidade de Vigo desde xullo de 2003 ata setembro de 2011, sendo o segundo presidente desta entidade, despois de Alfonso Zulueta de Haz. Nacido en Ourense, licenciado en Dereito e fundador do bufete de avogados Atrio Abad, foi decano do Colexio de Avogados de Ourense durante dez anos, ata 1995, cando foi nomeado decano honorario desa entidade. Entre os numerosos méritos recompilados durante unha vida dedicada ao dereito, están que foi membro fundador en 2001 da Corporación Europea de Avogados, que en 1989 lle foi concedida polo Ministerio de Xustiza a Cruz de Honra San Raimundo de Peñafort e que en 2005 recibiu a Medalla de Prata de Galicia, outorgada polo goberno autonómico.