O Servizo de Deportes renova a súa oferta das Escolas Deportivas

O inicio do curso trae para a comunidade universitaria novas oportunidades e ofertas para actividades deportivas e de lecer. Ata o 1 de outubro permanecerá aberta a matrícula para as Escolas Deportivas dos tres campus, que este ano teñen como novidade o Centro Deportivo aberto, que facilitará o uso das instalacións dos ximnasios da cidade para actividades libres ao gusto dos interesados.

No campus de Vigo ofrécense 16 modalidades deportivas repartidas entre as instalacións do Servizo de Deportes, o Complexo Deportivo Universitario e trece ximnasios da cidade. Os prezos e as datas e horarios das actividades depende do deporte elixido, desenvolvéndose no primeiro cuadrimestre entre o 4 de outubro e o 23 de decembro e do 10 de xaneiro ao 12 de febreiro.

As actividades que están a disposición da comunidade universitaria en Vigo, xa sexa alumnado, PSI ou PAS, comprende aquagym, natación, squash, spinning, judo, taekwondo, danza contemporánea, kick boxing, fitness-musculación, tai-chi+daoyin, chikung+pilates, wushu, ioga, meditación, tenis e xadrez.

A gran novidade para este curso que comeza é o acordo chegado con ximnasios da cidade no que se deu en chamar Centro Deportivo Aberto. Trátase de facilitar aos matriculados nesta modalidade o acceso a estas instalacións sen necesidade de matricularse nunha actividade deportiva concreta. En horarios acordados con cada centro deportivo, a comunidade universitaria terá acceso ás instalacións a un prezo vantaxoso e coa posibilidade de facer diversas actividades a elixir. Neste Centro Deportivo Aberto participarán o Complexo Deportivo Universitario, o AS Sport, o Ximnasio Kavis, Progress Gym, CD Coliseum, Ximnasio C. Simón, Budo Aqua Sport, Ximnasio Kiap, CD Lanzalía e Penta Deporte e Saúde.

A tarxeta deportiva universitaria

Outra das iniciativas que xa vén ofrecendo o Servizo de Deportes da Universidade é a Tarxeta Deportiva Universitaria nas súas dúas modalidades, a básica e do programa Ponte en Forma. En modalidade anual e cuadrimestral, a tarxeta básica permite o uso gratuíto en todos os horarios das instalacións deportivas da universidades como o rocódromo, as pistas ou a sala de cardio-fitness, así como prezos especiais en outras instalacións como o pavillón ou o campo de herba sintética e tamén descontos en actividades organizadas polo Servizo de Deportes como as propias Escolas Deportivas ou os programas Delecer ou Augaventura. A modalidade Ponte en Forma da tarxeta deportiva ofrece ademais dúas revisións médico-deportivas gratuítas, a prescrición de exercicio físico e o seguimento personalizado. Paralelamente, o Suplemento Dúo ofrece aos posuidores destas tarxetas os servizos dun ou dous ximnasios asociados para completar o programa de exercicio.

As taxas, horarios, documentación necesarios e concesión de créditos pode consultarse na web do Servizo de Deportes ou nas súas instalacións dos tres campus.