A Universidade avanza en Cádiz os seus progresos co plan de calidade

Un produto sen deficiencias, que goza de estima xeral ou cunhas características que se axustan ás necesidades do cliente. Deste xeito define o diccionario a calidade, un termo esencial no Plan Avante, o Plan Operativo de Xestión da Universidade de Vigo ata 2012 que aglutina as diferentes liñas de acción asociadas aos eixes de modernización, xestión académica e da investigación. Este 18 de novembro será o centro de debate nas IV Jornadas de Excelencia en la Gestión Universitaria, que reunirá en Cádiz a máis de 14 universidades e representantes do Bureau Veritas Certification ou da Axencia Estatal de Evaluación das Políticas Públicas e a Calidade dos Servizos. “A Universidade conta cunha xestión académica dinámica con capacidade para dar resposta aos retos e cambios que xurdan. En Cádiz o que imos expor é o desenvolvemento de todo este proceso”, explica Ángeles Hermida, directora da Área de Xestión Académica, que viaxará a Andalucía nunha expdición na que tamén participarán Ignacio Barcia, vicerreitor de Alumnado, Docencia e Calidade; Cristina Rodríguez, xefa do Servizo de Alumnado; Begoña Fernández, xefa da Sección de Títulos e Plans de Estudo; e Rosa Graña, coordinadora da Unidade de Estudos e Programas.

A posta en marcha do plan comezou en 2008 coa finalidade de incorporar a cultura da calidade ao ámbito de xestión , establecer os recursos organizativos de apoio, dotar de intanxibles e mobilizar á organización para a xestión da calidade, o que supón “satisfacer as necesidades e expectativas dos usuarios, facer ben o traballo á primeira e buscar a mellora continua”, recalca Hermida. Neste momento o plan vai “cumprindo etapas” e xa se está traballando nos procesos de títulos para sometelos ao Comité Técnico e comezar a certificar a principios de 2011. Precisamente a implantación de certificado do sistema de xestión de calidade, xunto a cartas de servizo, mellora de procesos e avaliación da satisfacción do usuario son os catro programas que integran o corazón do plan.

Unha xornada de premio

Este encontro suporá unha boa oportunidade para coller ideas, xa que a Universidade de Cádiz ten o seu plan de xestión de calidade moi avanzado. “Son as xornadas universitarias máis importantes a nivel nacional, así que é o foro ideal para o intercambio de experiencias”, asegura Rosa Graña. Unha viaxe que ademais trae moitos recordos e dos bos, xa que o ano pasado a Universidade de Vigo gañou un premio pola presentación do póster A planificación da calidade no ámbito de xestión da Universidade de Vigo-Retribucións e Seguros Sociais, elexida como a mellor sesión de comunicación das xornadas polos 27 responsables dos relatorios.

As melloras das universidades, a debate

Serán mesas redondas, relatorios e grupos de traballo que reunirán o 18 e 19 de novembro na Facultade de Enfermería e Fisioterapia de Cádiz a un gran número de profesionais movidos pola vontade de facer da Universidade unha institución que sexa capaz de dar resposta ás novas necesidades da sociedade. O teletraballo, a avaliación dos servizos, as acreditacións internacionais para áreas e titulacións, o complemento por productividade ou as novas dimensións do mundo online centrarán algúns dos puntos clave das xornadas.