A Universidade construirá unha piscigranxa sostible de troitas no Perú

Do que agora é un pequeno lago da alta montaña andina do Perú, nun ano poderán saír arredor de 20.000 troitas que axudarán a mellorar os hábitos alimentarios dunha das zonas máis pobres do país sudamericano. Detrás desta iniciativa está o catedrático da ETS de Enxeñaría de Minas, Enrique Orche que, da man da Universidade, Anfaco-Cecopesca e a Xunta de Galicia, foi quen de artellar un proxecto que dera resposta ás necesidades desta comunidade, coa que leva traballando dende hai anos en diversos eidos.

A Xunta de Galicia vén de aprobar a subvención para a proposta de Orche ao abeiro da convocatoria de axudas para proxectos de cooperación no exterior. Esta liña de traballo solidario é, segundo o reitor da Universidade, Salustiano Mato, “un xeito de internacionalizarnos, un dos obxectivos estratéxicos da institución no que levamos incidindo nos últimos dez anos e que será prioritario tamén para o Campus do Mar”. O obxectivo ultimo do proxecto en Perú é a mellora das condicións socioeconómicas da Comunidade Campesiña de Santa Bárbara de Huancavelica a través da acuicultura como elemento de desenvolvemento sostible

Froito da demanda interna

A piscigranxa instalarase na Lagoa de Parionaccocha de 400 m2, na comunidade campesiña de Santa Bárbara, na rexión de Huancavelica cun primeiro prazo xa marcado: nun ano debería producir 20.000 unidades de troita arco da vella de maneira sostible co obxectivo de mellorar a dieta da poboación da comarca, moi deficitaria pola falta de proteínas e imposibilidade de acceder ao peixe na que, paradoxicamente é unha das grandes potencias pesqueiras do mundo. Segundo apunta Enrique Orche, que xunto coa Vicerreitoría de Relacións Internacionais e a ORI, coordinan o proxecto, “mercaranse os ovos embrionados para engordalos en gaiolas no lago en ciclos dun ano”.

Esta actividade compleméntase co desenvolvemento de dous tipos de obradoiros: un para a capacitación na comercialización e consumo do peixe en condicións hixiénicas adecuadas e saudables; o segundo, para o fortalecemento da capacidade organizativa das mulleres da comunidade a fin de que colaboren eficazmente no autodesenvolvemento sustentable da mesma.

O profesor Orche leva anos involucrado en proxectos en Perú e Bolivia e explica que a idea da posta en marcha da piscigranxa non parte deste lado do Atlántico, senón da propia comunidade de Huancavelica, conscientes da súas necesidades. “É moi importante subliñar esta circunstancia, que será clave para o éxito do proxecto, somos unha mera correa de transmisión”, apuntaba. Incidía neste mesmo punto o reitor destacando que se trata de “transmitir coñecemento a través da cooperación, pero nunca caendo no pseudocolonialismo, senón traballando de xeito mutualista, de ti a ti, coas comunidades receptoras da colaboración”.

Proxección de futuro

Explica Orche que nesta zona o índice de pobreza rolda o 90% e que este proxecto ten tamén unha perspectiva de futuro moi interesante que permitirá o desenvolvemento económico e social da comunidade. Para isto, agardan os promotores que a produción acade no 2016 as 200.000 unidades de troita nesta lagoa situada a 4500 metros de altura. Tamén a longo prazo se plantea a posibilidade de comercializar a troita manufacturada da man de Anfaco para poder chegar a unha zona máis ampla do territorio peruano axudando así ao desenvolvemento da comunidade de orixe, composta por preto de 130 persoas.

Financiamento

O orzamento deste proxecto é de 208.000 euros, dos cales 155.000 será financiados pola Xunta de Galicia en dúas anualidades. A contía restante será achegada pola Universidade de Vigo, Anfaco e a Municipalidade de Huancavelica e as colaboracións desinteresadas de particulares.

Precisamente o director do Departamento de Formación e Cooperación Exterior de Anfaco, Gonzalo Ojea, salientou a experiencia que a asociación de empresarios galegos ten neste tipo de actividades de cooperación, que representan tamén unha oportunidade interesante para buscar sinerxías. Para este tipo de convocatorias de cooperación exterior, a Xunta de Galicia abre dúas liñas de axudas, unha para ONGs e outra para outras entidades, na que concorreu a proposta de Enrique Orche. Guillermo Otero, xefe do Servizo de Formación e Coordinación Institucional da Cooperación ao Desenvolvemento da Xunta de Galicia, recoñeceu o esforzo realizado por estas outras entidades como a Universidade e Anfaco para levar a cabo actividades solidarias e o seu valor engadido, xa que “achegan coñecementos técnicos que, doutro modo, sería complicado obter”.