Diario da Universidade de Vigo
Parten este venres no Sarmiento de Gamboa cara o Mar de Alborán e o Golfo de Cádiz
A Universidade lidera unha campaña oceanográfica para estudar o efecto das masas de auga nos fondos mariños
Na expedición internacional participan 40 investigadores, coordinados polo profesor Francisco Javier
En rosa, as áreas nas que vai traballar a expedición
O profesor e coordinador do proxecto, Francisco Javier Hernández
O grupo de 40 investigadores partirá o venres no Sarmiento de Gamboa, buque do CSIC
No proxecto Contouriber, coordinado pola UVigo participan 40 investigadores nacionais e estranxeiros
Un exemplo dos efectos da circulación da masa de auga mediterránea de salida polo Estreito de Xibraltar
Outro efecto da circulación das augas, con grandes ondas sedimentarias con ripples superpostos
Os revelos e sedimentos mariños amosan as pegadas e impactos da circulación das masas de auga oceánica e o estudo destes permite coñecer a evolución dos fondos e as implicacións ambientais. Este campo, aínda pouco estudado, permitirá á comunidade científica contar cun valioso rexistro evolutivo dos fondos mariños. Recabar estes datos é o obxectivo principal da campaña oceanográfica que este venres parte no buque Sarmiento de Gamboa baixo a coordinación do profesor do Departamento de Xeociencias Mariñas e Ordenación do Territorio, Francisco Javier Hernández. Esta expedición buscará no Mar de Alborán, o Golfo de Cádiz e o Estreito de Xibraltar novos datos, mapas e imaxes que permitan “avaliar o efecto que ten na actualidade e tivo no pasado a circulación das masas de auga nestes tres contextos xeolóxicos diferentes”.
A expedición enmárcase dentro do proxecto de investigación Contouriber, financiado polo Ministerio de Ciencia e Innovación, no que toman parte 40 científicos de institucións nacionais e estranxeiras baixo un paraugas multidisciplinar. O proxecto comprende tres subproxectos, un liderado pola Universidade de Vigo, outro polo grupo Geomarco do ICM-CSIC e outro polo Instituto Xeolóxico e Mineiro de España. A coordinación xeral dos tres corresponde ao profesor Hernández, que explica que se trata dunha iniciativa “moi importante e na que colaboran institucións internacionais de primeira liña”.
Modo de traballo e obxectivos
A bordo do Sarmiento de Gamboa e ata o 14 de outubro os investigadores elaborarán mapas detallados do relevo submarino mediante ecosondas, obterán imaxes do subfondo mariño ata profundidades de 2-3 km mediante sistemas sísmicos, datos magnéticos e gravimétricos, e recuperarán mostras de sedimentos mariños mediante diferentes sacatestigos de sedimentos. Algúns dos resultados, como apunta Hernández, “achegarán conclusións inmediatas”, pero outros moitos deberán ser estudados en laboratorio, polo que para as conclusións finais haberá que agardar algúns meses.A campaña pretende avaliar o efecto que ten no presente e tivo no pasado a circulación de masas de auga nos fondos do Mar de Alborán e no Golfo de Cádiz, á saída do Estreito de Xibraltar, para acadar catro obxectivos principais. Por unha banda trátase de caracterizar as estruturas xeolóxicas da marxe continental e como inflúen na circulación das masas de auga. Outra das finalidades é cartografiar, algúns por primeira vez, e determinar como se constrúen, os depósitos contorníticos (acumulación sedimentaria) xerados pola influenza das masas de auga mediterráneas. Ademais tratarase tamén de determinar a súa evolución en cada unha das zonas para reconstruír as variacións climáticas e do nivel do mar. Finalmente, os científicos do proxecto tentarán buscar as implicacións das masas de auga sobre os fondos mariños, tanto na presenza dos recursos minerais, como sobre o desenvolvemento de xeohabitats específicos.