Diario da Universidade de Vigo
Será o mércores 21, ás 12.00 h, na Facultade de Ciencias Sociais e da Comunicación
A Universidade organiza unha homenaxe “in memorian” ao profesor Xan Bouzada
Para recordar a pegada que deixou en todos os que o coñeceron e coa perspectiva que dan os oito meses que transcorreron desde o seu falecemento celebrarase o mércores 21 unha homenaxe ao profesor Xan Bouzada. O acto terá lugar no salón de graos da Facultade de Ciencias Sociais e da Comunicación e reunirá a amigos, alumnos e compañeiros no recordo ao sociólogo.
O reitor, Alberto Gago, presidirá un acto que tamén contará coas intervencións do decano da facultade, Alberto Pena, e o profesor Xesús Lage Picos, amigo e compañeiro de departamento de Bouzada. Ademais, a organización invitou a dous profesores da Universidade de Santiago de Compostela a participar no acto pola súa vinculación persoal e profesional co homenaxeado. Trátase de Luís Álvarez Pousa, profesor de Xornalismo especializado na Facultade de Ciencias da Comunicación e co que Bouzada colaborou cando este ocupou o cargo de director xeral de cultura e na fundación da revista Tempos Novos, e Henrique Monteagudo con quen Bouzada elaborou o mapa sociolinguístico de Galicia e colaborou no Consello da Cultura de Galicia e na revista Grial.
O acto estase organizando con moito cariño e coidado e por iso, parte do que alí acontecerá gárdase en segredo, confiando en axudar a facer presente a figura do profesor. Ademais está previsto que a facultade lle entregue á súa familia unha insignia de honra de ouro con brillantes en recoñecemento ao seu labor.