Diario da Universidade de Vigo
Coa organización do I Congreso Iberoamericano nesta materia, que se celebrará do 3 ao 5 de outubro
A Universidade, á vangarda da xustiza terapéutica
Pontevedra reunirá preto de 200 expertos que loitan por unha lexislación “máis xusta e humana”
A catedrática Francisca Fariña, presidenta do comité organizador e da asociación
Celebrarase do 3 ao 5 de outubro no Pazo de Congresos de Pontevedra
A Universidade de Vigo convértese en referente internacional no ámbito da xustiza terapéutica coa organización do I Congreso Iberoamericano nesta materia, que se celebrará no Pazo de Congresos de Pontevedra do 3 ao 5 de outubro. Esta xuntanza convértese nunha das primeiras accións promovidas pola Asociación Iberoamericana de Xustiza Terapéutica, encabezada por Francisca Fariña e por Esther González Pillado, catedráticas da Universidade de Vigo. “É altamente relevante para esta institución liderar, a nivel iberoamericano, unha corrente no ámbito legal moi importante ademais de ser a sede oficial da asociación”, sinala Francisca Fariña, tamén presidenta do comité organizador do congreso.
O termo ‘xustiza terapéutica’ xurdiu a finais dos anos 80 en Estados Unidos “e sen dúbida é o país no que ten máis forza”, aclara Fariña, primeira presidenta da asociación iberoamericana creada a finais de 2011 co obxectivo de que a lexislación conte cun perfil “máis xusto e humano”. Axiña se estendeu a outros países como Canadá ou Australia e, nos últimos anos, a outros lugares de Iberoamérica. No caso de Galicia, xa diferentes leis se encadran dentro da xustiza terapéutica, “tal como a recente lei de mediación, a reguladora da responsabilidade penal do menor ou a do permiso e licenza de condución por puntos”, exemplifica a catedrática e decana da Facultade de Ciencias da Educación e do Deporte, aínda que asegura que “queda un longo camiño por percorrer para que a lexislación sexa plenamente rehabilitadora na nosa comunidade e en España”. Non obstante, a experta declara que a situación económica actual pode ser unha oportunidade para realizar cambios xa que os principios da xustiza terapéutica "son altamente compatibles con aquelas políticas que combinan eficiencia e austeridade", puntualiza, e este congreso convértese nun bo escaparate "para que as institucións se conciencien dos beneficios que pode achegar á cidadanía e ao estado".
Tres días de “intenso” debate
Durante tres días, Pontevedra reunirá a preto de 200 expertos procedentes de toda Iberoamérica, especialmente de Colombia, Chile, México, Arxentina, Perú, Brasil e Porto Rico. Como aclara a propia Fariña, “organizar o congreso en España non foi unha decisión fácil, porque parecía máis oportuno, para facilitar a asistencia aos membros da asociación, que tivera lugar nun país americano”. Dado o carácter multidisciplinar da xuntanza, participarán expertos das áreas de psicoloxía, dereito, medicina legal, psiquiatría, traballo social, socioloxía ou criminoloxía, que debaterán sobre temas de “grande interese” legal e social, como a mediación no ámbito civil e penal con adultos e menores; a especialización da xustiza; o dereito de familia; os programas de intervención con penados dentro e fóra de prisión ou a conformidade no proceso penal.Un total de dez conferencias científicas e mesas redondas repartiranse entre o 3 e o 5 de outubro, sendo inauguradas por David Wexler, “pai da xustiza terapéutica e director do International Network on Therapeutic Jurisprudence”, aclara Fariña. Tamén intervirán representantes do Consello Xeral do Poder Xudicial; o secretario xeral da Conferencia de Ministros de Xustiza dos Países Iberoamericanos; a presidenta da Corte de Arbitraxe e Mediación de Valencia e o presidente da Asociación Española de Avogados de Familia, AEAFA, entre outros.