Reitores e responsables das consellerías de Educación e Sanidade reuníronse hoxe
Universidades e Xunta achegan posturas cara a resolución das diferenzas xeradas en relación coa titulación de Medicina
Os reitores das tres universidades galegas, o secretario xeral de Universidades e a xerente do SERGAS continuaron avanzando hoxe na consecución dun acordo que permitirá dar solución ás diferenzas xurdidas entre as institucións académicas en relación coa docencia en Medicina, así como coa posta en funcionamento doutra facultade en Galicia.
Os reitores das institucións académicas galegas e os representantes das consellerías de Educación e Sanidade, mantiveron un encontro hoxe en Santiago, ao termo do cal coincidiron en sinalar os avances acadados que segundo manifestou o reitor da Universidade de Santiago, Senén Barro, “concretaranse nun documento que se está elaborando”. Tras manifestar nas últimas horas os responsables das universidades a súa intención de non abordar este ano por causa dos recortes orzamentarios a creación de novas facultades de Medicina, o reitor de Santiago manifestou que hoxe no encontro coa Xunta “avanzáranse nalgúns detalles” e que “unha vez que as universidades temos avances sobre iso, parece lóxico un acordo de todos”.
En relación coa docencia en Medicina e sobre a figura do colaborador docente, o reitor de Santiago sinalou que hoxe non se abordou ese asunto aínda que hai unha comisión para traballar no desenvolvemento desa figura.