A UVigo participa no proxecto europeo Globdives sobre habilidades de xestión da diversidade na educación superior

Os membros do proxecto europeo KA2 Global Citizenship and Diversity Management Skills in Higher Education (Globdives), entre eles a Universidade de Vigo, reúnense esta semana no campus de Ourense para facer balance dos seus avances e para levar a cabo unha das súas liñas de acción, un programa de formación para profesorado. Globdives céntrase no desenvolvemento de habilidades de xestión da cidadanía global e da diversidade na educación superior.

Os socios do proxecto son Kauno Kolegija (Lituania), Universitatea Alexandru Ioan Cuza din Iași (Romanía), Lab-ammattikorkeakoulu Oy (Finlandia) e Hochschule für Technik und Wirtschaft des Saarlandes (Alemaña), contando ademais coa colaboración de empresas e organizacións non gobernamentais. Por parte da UVigo participa o persoal docente e investigador Elena de Prada, Marcos Álvarez, José Luis González Cespón, Margarita Pino, Susana Reboreda e Mercedes Mareque, un equipo, destaca Elena de Prada, multidisciplinar procedente de diversas facultades, como son Relacións Internacionais, Historia e Ciencias Empresariais e Turismo (do campus de Ourense); Ciencias da Educación e do Deporte (do campus de Pontevedra) e a Escola de Enxeñaría Industrial (do campus de Vigo). A iniciativa aborda cuestións de diversidade na contorna académica, relacionadas por exemplo coa etnia, a raza, a nacionalidade, a identidade de xénero e a orientación sexual, tendo como obxectivo promover e mellorar a conciencia sobre a cada vez maior importancia da inclusión e a xestión desta diversidade nas institucións de educación superior.

Marco pedagóxico e formación

O proxecto, financiado a través do programa Erasmus+ KA2 Higher Education Cooperation Partnerships, ten como obxectivos crear “un marco pedagóxico para o ensino da cidadanía global e a xestión da diversidade ao alumnado europeo de educación superior”; un curso (presencial e virtual) centrado na xestión da diversidade e a cidadanía global e un conxunto de ferramentas para que as e os profesores integren estes temas nos seus cursos de calquera materia do plan de estudos, co reto para desenvolver a perspectiva global e a sensibilidade intercultural do alumnado universitario. Para desenvolver estes produtos, ao abeiro de Globdives realizouse en Lituania un programa intensivo para estudantes das universidades sociais no que se probou a eficacia dos materiais deseñados para o curso.

Completando esta programación, o proxecto contempla unha sesión de formación de profesorado, que se celebra estes días no campus de Ourense e na que participan docentes das universidades europeas socias do proxecto. A cita tamén é aproveita para facer balance de Globdives, que arrancou en xaneiro de 2022 e rematará o vindeiro mes de decembro. Finalizado o proxecto, indican desde a súa organización, o reto será intentar integrar as súas propostas dentro das respectivas universidades para fomentar e facilitar nelas a cidadanía global e a diversidade nas aulas.