Pontevedra sorprende co primeiro posto en fútbol masculino
Vigo arrasa no Intercampus coa vitoria en catro modalidades
Ourense, campión merecido en baloncesto feminino
O campus de Pontevedra viviu onte a súa xornada máis deportiva do curso coa celebración do torneo Intercampus 2010, no que os mellores equipos de Vigo, Ourense e Pontevedra se enfrontaron nas finais das Ligas Universitarias. Un ano máis confirmáronse os prognósticos e o campus de Vigo, que partía como favorito, foi o campión en catro das sete modalidades da competición: baloncesto masculino, fútbol sala feminino, fútbol sala masculino e voleibol masculino. O campus de Pontevedra sorprendeu cunha inesperada vitoria en fútbol masculino e quedou tamén como primeiro clasificado en balonmán masculino. Pola súa parte, o campus de Ourense marchou para a casa cun merecido primeiro posto en baloncesto feminino. Os sete equipos mellor clasificados participarán no Campionato Galego de Deportes Colectivos, que terá lugar en Santiago de Compostela os días 24 e 25 de febreiro.
O responsable do Servizo de Deportes no campus pontevedrés, Gustavo Loureiro, quixo destacar por riba de todo o “bo nivel deportivo” amosado por todos os equipos.
Ao remate da xornada Ana Belén Fernández Souto, directora da Área de Extensión Cultural e Estudantes, fixo entrega dos trofeos no Pavillón Universitario.
Vitoria inesperada nas modalidades masculinas
O campus de Pontevedra partía como favorito en balonmán masculino, modalidade na que quedou como primeiro clasificado ao non presentarse o equipo de Vigo anotado na competición, pero sorprendeu en fútbol, onde se lle daban poucas posibilidades. O campionato xogouse a tres partidos e Pontevedra chegou á final logo dunha axustada vitoria resolta a penaltis. Venceu cun 3 a 2.Enfrontáronse nas finais masculinas, tanto de voleibol coma de fútbol sala, Ourense e Vigo. Na primeira impúxose claramente Vigo cun resultado 0-2 ao seu favor e cun dominio do xogo ao longo de todo o partido. A segunda estivo máis disputada e os dous equipos amosaron un alto nivel. Finalmente gañou Vigo con 5 goles fronte a 3.
O campionato de baloncesto masculino rematou cun derbi entre dous equipos vigueses, que se resolveu cun axustado marcador 53-48.
Campións claros en baloncesto e fútbol sala femininos
Á fase final de baloncesto feminino chegaron só dous equipos dos campus de Ourense e Pontevedra. O partido acabou cunha vitoria clara para as ourensás, que anotaron 57 tantos fronte aos 36 das pontevedresas.A competición de fútbol sala feminino estivo marcada pola lesión de varias xogadoras, que tiveron que ser atendidas no hospital de Montecelo. Vigo e Ourense impuxéronse por goleada a Pontevedra nos dous primeiros encontros. O xogo estivo máis igualado na final, que se saldou cun 2-4 a favor de Vigo.
De cara á convocatoria de ámbito galego, Gustavo Loureiro considera difícil atinar cun prognóstico claro porque “ano a ano varía moito o nivel nos diferentes campus”, pero lembra que “tradicionalmente a Universidade de Vigo é a que gaña en máis modalidades”. Así e todo, atrévese a sinalar como bazas seguras os equipos de balonmán, que competirán tamén na categoría feminina malia non ter participado no Intercampus, e os de baloncesto.