O VII Trofeo de Atletismo Club Deportivo Aurum traerá ao campus “aos mellores velocistas de Galicia”

Este sábado, 24 de marzo, as pistas de atletismo do campus de Ourense acollerán unha nova competición deportiva. Será o VII Trofeo de Atletismo Club Deportivo Aurum, que contará coa participación de 300 inscritos, entre eles “os mellores velocistas de Galicia”, segundo indica a organización. O certame, que comezará ás 18.00 h, premiará ao mellor atleta masculino e feminino da competición.

A cita foi presentada este venres por Virxilio Rodríguez, vicerreitor do campus de Ourense; Mario Guede, concelleiro de Deportes; Rodrigo Alberte Pivida, responsable do Servizo de Deportes do campus de Ourense, e Eladio Gómez, presidente do Club Deportivo Aurum. O vicerreitor do campus salientou como a universidade volve unha vez máis a pór a disposición da cidadanía “unhas instalacións de altas prestacións” como son as pistas universitarias e gabou o labor do Club Deportivo Aurum “nun deporte que non é maioritario pero si moi interesante” como é o atletismo. Da cita, Mario Guede recalcou que se trata “dunha competición do máximo nivel” que marcará o inicio do calendario de competicións ao aire libre na cidade.

Cambio de rexistro

Apuntando como para o seu club este trofeo “é o acontecemento do ano”, Eladio Gómez indicou como nesta edición o certame “dá un xiro radical”, pasando dun programa máis centrado no fondo a outro máis centrado na velocidade. Este cambio, sinalou, débese a múltiples circunstancias, como son o auxe desta modalidade en Galicia e o desexo de aproveitar o feito de que esta fin de semana tamén hai unha concentración da atletas da Federación Galega de Atletismo que permite ter en Ourense “aos mellores velocistas de Galicia”. Tamén subliñou o presidente do Club Deportivo Aurum o feito de que “Ourense é na actualidade a punta de lanza do atletismo galego”, grazas entre outros aspectos, citou, ás instalacións deportivas existentes no campus, en Expourense e en Monterrei.

Durante a presentación, Eladio Gómez entregou en nome da xunta directiva do club unha distinción a Virxilio Rodríguez “pola súa colaboración estes catro anos”. O presidente do Club Deportivo Aurum agradeceu ao vicerreitor do campus a colaboración prestada ao longo deste período non só ao atletismo ourensán senón tamén galego. Virxilio Rodríguez recolleu a distinción agradecendo este recoñecemento e destacando como “é un luxo” contar en Ourense con axentes sociais “comprometidos” como este club deportivo.