Visita o campus unha delegación da Universidade de Zagreb
Co fin de coñecer o funcionamento da Vicerreitoría de Planificación e Sostibilidade
A Vicerreitoría de Planificación e Sostibilidade recibiu a visita dunha delegación da Universidade de Zagreb (Croacia) interesada en coñecer o funcionamento da Vicerreitoría de Planificación e Sostibilidade da Universidade de Vigo. Formaron parte desta delegación a directora da Oficina de Desenvolvemento, Investimentos e Planificación Espacial, Martina Cvitanovic, e a directora da sección de Planificación Espacial, Silvana Cubric.
Tras a benvida do vicerreitor, José Luis Míguez Tabarés, encargouse de acompañalas o director da Área de Innovación Administrativa, Manuel Pérez Cota, quen lles amosou o funcionamento da vicerreitoría e as súas distintas seccións, ademais de exercer de guía nunha visita polo campus. Pola súa banda, o director da Área de Infraestruturas e Prevención de Riscos Laborais, Carlos Caamaño, explicoulles os sistemas de planificación e xestión das distintas infraestruturas da UVigo.
A Universidade de Zagreb é a universidade máis antiga de Croacia (1669) funcionando ininterrompidamente e, tamén, a institución de ensino superior máis antiga do sudeste de Europa. Está composta por 29 facultades, tres academias de arte (Arte Dramático, Belas Artes e Música) e un centro universitario (CU de Estudos Croatas).