O voleibol súmase á oferta deportiva do campus

No obxectivo de sumar novas iniciativas á oferta de actividades deportivas que promove no campus de Pontevedra, a Área de Benestar, Saúde e Deporte pon en marcha, xunto co Club Voleibol Pontevedra, unha “escola de iniciación e perfeccionamento” neste deporte, como explica o técnico da área no campus, Gustavo Loureiro. De carácter gratuíto, trátase dunha actividade aberta aos usuarios e usuarias do abono Muver, que desenvolverá a súa actividade no Pavillón Universitario, todos os luns e mércores en horario de 20.00 a 21.00 horas ata finais de curso. Trátase, como engade Loureiro, dunha actividade “que se leva a cabo no campus por primeira vez”, e que se suma a outras escolas deportivas que permiten á comunidade universitaria iniciarse na práctica do rugby ou do xadrez.