Un voto decide as eleccións ficticias da Facultade de Comunicación

Un total de 185 persoas participaron ao longo deste xoves nas votacións que puñan peche á campaña electoral que a Facultade de Comunicación viviu nas últimas dúas semanas e na que catro partidos creados polo alumnado do Grao en Publicidade e Relacións Públicas disputábanse unha parte da súa nota na materia Técnicas de comunicación electoral e institucional. Promovidas polo profesor Xosé Rúas co obxectivo de que o estudantado poña en práctica os coñecementos adquiridos sobre comunicación electoral, estas eleccións pecháronse co resultado máis axustado da última década, xa que un só voto determinou o nome da formación gañadora, Uniproject X, que obtivo 63 apoios, fronte os 62 do partido Aquí no hay quien estudie.

Aberta a todo o alumnado, profesorado e persoal da facultade, coa excepción dos participantes na actividade, nestas eleccións acadou 34 votos o partido Fanfarrones e 21 apoios a formación OSCAR, á vez que se rexistraron tamén cinco votos nulos. “A verdade é que foi unha campaña bastante intensa e disputada”, sinala Rúas dunha contenda electoral que define como un “xogo de rol”. De feito, a actividade arrancou o 24 de abril cunha pegada de carteis, para logo acoller tamén a organización de mitins e dun debate entre candidatos e candidatas, así como as diferentes actividades de campaña que as formacións promoveron tanto nos espazos que ocuparon na planta baixa do centro como a través das redes sociais.  

Comunidade e emprendemento, eixes do partido gañador

A película Proxecto X e a firma de moda Nude Project serviron como fonte de inspiración ao partido gañador destes comicios, que presentou a Carla Fra como candidata. “Este foi un traballo de clase, pero serviunos para mellorar moito como grupo”, sinala esta alumna respecto dunha campaña que Uniproject X articulou arredir de "dous eixes principais”. Por unha banda, puxeron o foco en que a xente nova pode pór en marcha os seus propios proxectos empresariais, o que levounos “a traer un emprendedor novo cada día” á facultade. Por outra, apunta Fra, “quixemos tamén crear comunidade e ser moi próximos ao resto do alumnado”, a través de iniciativas como xogos, unha festa ou a entrega de apuntes. 

A idea de “crear comunidade” foi tamén un dos piares da campaña de Aquí no hay quien estudie, formación que tiña como candidato a Pedro Grandal e como fonte de inspiración a serie Aquí no hay quien viva. “Buscamos crear comunidade a través de diversos xogos, a través de traer comida, como o resto dos partidos, do sorteo de entradas para festivais ou de prendas roupa...”, relata Grandal, que recoñece que foi unha iniciativa “bastante entretida e bastante, aínda que é certo que a carga de traballo é moi grande”. 

“Moi contentos coa actividade, coa que melloramos en moitos aspectos como é a comunicación, a nivel interno e externo, e coas empresas” amósanse tamén desde Fanfarrones que, de xeito irónco, presentábase a estes comicios como un “partido de corruptos”. Xogando con esa idea, como explica o seu candidato, Adrián Martínez, levaron a cabo xogos con maletíns ou “chuvias de billetes”, así como unha festa ou sorteos de camisetas de equipos de fútbol. Os xogos e sorteos formaron parte tamén das actividades de OSCAR (Organización Social contra o Academicismo Retrógrado), formación que inspirou a súa estética nos premios cinematográficos. “Serviunos de moito á hora de aprender a traballar en equipo, ter un obxectivo común é loitar por el”, sinala a súa candidata, Uxía Seoane, que explica que unha das liñas da súa campaña foi “enxalzar a cultura”, con iniciativas como concertos.