Un cento de persoas participaron nesta iniciativa no Pavillón Universitario
O XIX Maratón Solidario de Zumba reúne preto de 200 quilos de alimentos
Entregados ao comedor social dos Pais Franciscanos
Preto dun centenar de persoas sumáronse na tarde deste xoves ao XIX Maratón Solidario de Zumba, unha actividade impulsada pola Área de Benestar, Saúde e Deporte da Universidade e a Vicerreitoría do campus que busca tanto promover a práctica de actividade física como contribuír ao labor social que desenvolven no comedor dos Pais Franciscanos. De feito o único requisito para tomar parte nunha actividade aberta a toda a cidadanía era achegar ao Pavillón Universitario cando menos un quilo de alimentos non perecedoiros, o que permitiu nesta edición reunir preto de 200 quilos de produtos, que foron entregados a este comedor social.
Durante dúas horas, as participantes neste maratón movéronse ao ritmo das coreografías propostas por un equipo de monitores e monitoras coordinado por Bruno Hermida, nun evento que contou tamén coa colaboración de Coca-Cola e Gadis, que achegaron froita, bebidas e barriñas enerxéticas para seguir bailando.