Diario da Universidade de Vigo
O equipo universitario gañou esta fin de semana ao Porriño BTO Base Grupo Pescanova
As xogadoras de baloncesto amosan a súa calidade na cancha
O conxunto masculino perdeu contra o Seis do Nadal-Coia
O equipo universitario gañou esta fin de semana ao Porriño BTO Base Grupo Pescanova. Imaxe de arquivo do conxunto
Esta fin de semana os equipos de rugby tiveron xornada de descanso pero si xogaron encontros de liga os conxuntos universitarios de baloncesto, tanto o masculino coma o feminino. As xogadoras continúan amosando na cancha o seu bo xogo e gañaron o encontro que disputaron contra o Porriño BTO Base Grupo Pescanova. Pola súa banda, o conxunto sénior masculino viuse superado pola calidade do Seis do Nadal-Coia, equipo contra o que perdeu por un resultado final de 38-58 puntos.
Na Copa Galicia Sur da primeira división autonómica feminina, o Universitario Campus de Ourense sénior feminino de baloncesto disputou a súa terceira xornada de competición o sábado 22 de outubro contra o Porriño BTO Base Grupo Pescanova. As ourensás acadaron un punto positivo e un marcador de 55-67 que as situou segundas na táboa, por detrás do Compañía de María e por diante do Porriño BTO Base Grupo Pescanova. Rematada esta copa, o día 24 de novembro, o conxunto comezará a competir na liga regular da primeira división autonómica feminina, enfrontándose ao Arxil Mafari Café no seu primeiro encontro a disputar.
Pola súa banda, o Universitario Campus de Ourense de baloncesto sénior masculino acumulou o sábado 22 de outubro a súa segunda derrota consecutiva na primeira división. Na terceira xornada de competición, os ourensáns víronse superados polo Seis do Nadal-Coia e remataron o encontro cun resultado de 38-58 e un punto negativo que os sitúa como novenos na táboa. A vindeira fin de semana, o día 9, o conxunto universitario enfrontarase ao Baloncesto Cambre en busca dunha vitoria que rompa os malos resultados dos últimos encontros disputados.