Gañadores de torneos internos e clasificados dos Campionatos de España foron agasallados
A XVII Festa do Deporte reafirma o compromiso da Universidade coa práctica deportiva
Homenaxeouse á Federación Galega de Taekwondo, á Escola Universitaria de Fisioterapia e á BRILAT
Cun marcado ton humorístico da man da compañía Teatro de Cada Quen, a XVII Festa do Deporte puxo fin a toda unha tempada de competicións cunha gala na que se rendeu homenaxe aos deportistas que destacaron nos distintos torneos internos que a institución académica organiza durante o ano. Ademais, no evento fíxose unha mención especial aos 10 membros da Universidade que obtiveron unha medalla nos Campionatos de España así como un recoñecemento ao importante labor que algunhas institucións como o Equipo de Taekwondo ou a Escola Universitaria de Fisioterapia, desempeñaron ao longo de todo o curso.
O acto, que tivo lugar na Escola Universitaria de Enxeñaría Técnica Forestal, estivo presidido polo vicerreitor do campus de Pontevedra, Jesús Hernández, que amosou o seu apoio incondicional a todo tipo de iniciativas a prol do deporte e subliñou que “é necesaria unha maior énfase en todos os programas relacionados co eido da actividade física que a Universidade está poñendo en marcha”. Xunto ao vicerreitor, para facer a entrega dos trofeos contouse coa presenza de outras personalidades tanto da Universidade como de empresas e institucións públicas como a vicerreitora de Extensión Cultural e Estudantes, María del Carmen Cabeza Pereiro; a delegada de Cultura de Pontevedra, María Xesús López Escudeiro; o xefe de Relacións Externas de El Corte Inglés (Vigo), José Manuel Blanco, o director de Marketing e Publicidade de Caixanova, Jorge Santos, e o xerente do Instituto Municipal de Deportes de Pontevedra, Jaime Agulló Sueiro, entre outros.
Entrega de trofeos e condecoracións
Na décimo sétima edición da Festa do Deporte un gran número de deportistas pasaron a recoller o seu trofeo, destacando aos representantes da sección de Xadrez: o campión galego absoluto, Pablo García Castro e os gañadores das categorías sub 14 e sub 18, Samuel Villar e Miguel Senlle. Tamén foi galardoada a campiona de España de Triatlón, Marta Consuegra, así como o equipo feminino de Tenis e o de Xadrez na División de Honor. Por outra banda, todos os medallistas nos Campionatos de España Universitarios recibiron a súa particular condecoración: as 10 medallas de Taekwondo; o bronce de Ángeles Díaz Seoane en Remo; as de prata de Lorena Luaces, Paula Campanero e Víctor Riobó en Atletismo; e o bronce de Beatriz Viteri nesta última disciplina.Finalmente desde o Servizo de Deportes rendeuse unha homenaxe á Federación Galega de Taekwondo, á Escola Universitaria de Fisioterapia e á BRILAT, “tres institucións que apoiaron decididamente curso a curso as actividades e eventos que organizamos”, apuntou o responsable, Javier Rial. Ademais, os representantes da Universidade non se esqueceron de mencionar á gran cantidade de voluntarios que axudaron na organización das competicións, ao persoal do Instituto Municipal de Deportes do concello de Pontevedra e a Marcos Herrero, alumno colaborador do Servizo de Deportes desde o 2004.