Alumnado de Dereito afonda na protección do cliente ante as malas prácticas bancarias

A Área de Dereito Mercantil da Universidade de Vigo organizou este luns na Facultade de Dereito do campus de Ourense un obradoiro sobre a protección do cliente ante as malas prácticas bancarias. Foi ofrecido por Francisco González, catedrático de Dereito Mercantil da Universitat de València. A actividade, dirixida pola catedrática Ana María Tobío e o profesor Juan Manuel de los Ríos, contou co apoio do centro que a acolleu e do Consello Social da UVigo.

O relator explicou que as e os consumidores de produtos financeiros están cada vez máis informados dos seus dereitos. Porén, sinalou a importancia que o alumnado de Dereito se achegue a cales son as malas prácticas máis habituais en relación cos bancos e como reclamar contra elas extraxudicialmente. Neste senso lembrou que estas malas prácticas poden afectar a calquera cidadán e o recurso de presentar unha demanda non está ao alcance de todas as persoas. O catedrático de Dereito Mercantil falou sobre os servizos de reclamacións tanto de entidades de crédito como, de xeito especial, do Banco de España, e das súas potencialidades, afondando sobre o que poden ou non atender. No caso do Banco de España, Francisco González destacou que leva funcionando 35 anos e que “cumpre un labor moi importante”.

Na actualidade, sinalou o relator, hai dous grupos principais de malas prácticas bancarias. O primeiro, cun crecemento exponencial nos últimos anos, indicou que é o de fraudes a través de medios dixitais, como por exemplo suplantando a identidade dunha entidade bancaria por correo electrónico ou mesmo mensaxes de WhatsApp para obter os datos de acceso ás contas e extraer diñeiro delas. Francisco González subliñou a importancia de  “intentar facer algo para solucionar estas condutas de fraude” que, indicou, o servizo de reclamacións do Banco de España non pode atender porque son un tema penal. Un segundo bloque de malas prácticas exposto polo catedrático de Dereito Mercantil foi o das comisións, como as de mantemento de contas ou relacionadas con hipotecas e con problemas con tarxetas de crédito. Neste senso chamou a atención sobre o feito de que aínda que as comisións como as de mantemento supoñen pequenas cantidades para cada persoa afectada, sumadas supoñen grandes sumas de diñeiro. No obradoiro, o alumnado, unha vez recibida a información de contexto, púxose mans á obra para eles mesmos redactar as correspondentes reclamacións en varios supostos habituais de malas prácticas bancarias.