Diario da Universidade de Vigo
Este mércores tivo lugar unha nova sesión da Miteu da man da Aula de Teatro da USC
Falamos de felicidade?
A vindeira semana haberá representacións o mércores 26 e o xoves 27
Un intre da representación no Teatro Vidal Bolaño
A posta en escena correu a cargo de Roberto Salgueiro
As representacións volverán ao Vidal Bolaño a vindeira semana
Continúan as representacións da Mostra Internacional de Teatro Universitario, Miteu. Este mércores foi a quenda da Aula de Teatro da Universidade de Santiago de Compostela, que trouxo ao Vidal Bolaño a obra Observacións sobre a felicidade (Composición e manexo), estreada o pasado mes de decembro en Compostela e na que se reflexiona sobre a ledicia, como entendela e tamén como usala.
Baixo a dirección de Roberto Salgueiro e con textos de Aira Portos, Laura López e do propio Salgueiro, o espectáculo introduciu ao espectador nunha serie de diálogos nos que achegaron diferentes puntos de vista sobre o que supón, ou non, ser feliz. Bárbara María Domínguez, Laura López Esteban, Aira Portos Rey, Laura Codesido Mella e Breixo Barreiro Mira compuxeron o elenco de actores, mentres que Ximena Torrón Núñez encargouse da asistencia de dirección. “Estás equivocada. Falar da felicidade é falar de ciencia. A felicidade non é un asunto relativo ao espírito ou ao intanxible: é unha cuestión científica”, afirmouse nun fragmento da peza teatral. “A felicidade é unha cuestión de neurotransmisores, que son as biomoléculas que transmiten información entre neuronas; ou desde unha neurona ata as glándulas ou as células do noso organismo”, continuou outro dos textos que integran esta obra de arredor de 50 minutos de duración.
A Miteu contará a vindeira semana cunha dobre sesión. O mércores 26 será a quenda do espectáculo Intermitencias, da Aula de Teatro do Campus de Pontevedra, e o xoves 27 de Eréndira é Aríndere, da Compañía de Teatro Universitaria da USC-Lugo.