Profesionais formadas na Facultade de Comunicación comparten co alumnado os seus inicios no mundo laboral

Catro profesionais da creatividade publicitaria retornaron este luns ao centro no que se formaron, a Facultade de Comunicación, para compartir co alumnado os seus primeiros pasos no mundo laboral e a súa visón respecto do presente e o futuro do sector. Fixérono no marco das Conversas Empresa Universidade, unha iniciativa promovida polo Campus Crea coa colaboración da Deputación de Pontevedra e o Consello Social da Universidade de Vigo, que nestas semanas achega a diferentes facultades as visións dunha vintena de profesionais da fotografía, a publicidade, a fisioterapia e o deseño.

Da man de “catro exalumnas de distintas promocións”, a xornada deste luns puxo o foco na “creatividade publicitaria, desde unha perspectiva ampla”, como explicou na presentación a directora da Área do Campus de Especialización Crea, Ana Belén Fernández Souto. Para iso, o encontro contou coas intervencións de Noelia Estévez, socia fundadora do estudio Desoños, da responsable da axencia Igráfica, Irene García; así como con Umá de Oliveira, creativa en NTT Data, e Lidia Dosil, do departamento de márketing de Casa Grande de Xanceda, que lembraron tamén o premio que acadaron, na súa etapa como alumnas, no Festival Iberoamericano de Comunicación Publicitaria El Sol. 

Nun “formato informal”, como sinala Fernández Souto, estes encontros buscan non só que o estudantado coñeza as traxectorias e os ámbitos de traballo das diferentes profesionais, senón tamén “as circunstancias, oportunidades e problemas” cos que se atoparon ao rematar os seus estudos. Con esa mesma idea, estas conversas arrancaron o pasado venres cun encontro centrado na fotografía na Casa das Campás, no que participaron as fotógrafas Beatriz Ciscar e Susana Ríos, o fotógrafo e director de arte para marcas de moda Gabriel Mar, exalumno da Facultade de Comunicación, o director do centro de impresión Imprimeverde, Daniel Rodríguez; e o director adxunto da axencia de publicidade Ecovigo, Carlos Prado.

Dúas citas por diante en Fisioterapia e Deseño

A seguinte conversa terá lugar o xoves 9 de novembro en Fisioterapia, coa participación de catro profesionais formados nesta facultade, Alejandro Varela, do Servizo Galego de Saúde; Xoel Hermelo, director das Clínicas Saúde Sport; Hugo Ogando, fundador de ClínicasON; e Alejandro Fernández, responsable da Clínica San Lázaro, así como do fisioterapeuta do Hospital Rivera Povisa Carlos Cáceres. Xa entre o 27 de novembro e o 1 de decembro, esta iniciativa completarase con tres talleres na Facultade de Deseño. Estarán centrados na ilustración de moda, o deseño de embalaxe e o deseño editorial, a cargo de Áurea Aburto e os estudos Cenlitrosmetrocadrado e Desescribir.