Manel Varcarce ofreceu unha conferencia sobre este tema
Unha revolución tecnolóxica que tamén chega á xestión no mundo do deporte
Contou coa participación do secretario xeral para o Deporte da Xunta
A Facultade de Ciencias Empresariais e Turismo do campus de Ourense celebrou este xoves pola tarde, a través do Campus Remoto da UVigo, unha conferencia sobre Tecnoloxía aplicada á xestión deportiva. Manel Varcarce, CEO de Valgo Investiment Consultoría Deportiva, foi o encargado de analizar como a revolución tecnolóxica dos últimos anos chegou tamén ao mundo do deporte.
O acto, enmarcado dentro das actividades extracadémicas do campus de Ourense, contou coa participación tamén de Patricio Sánchez, coordinador do Máster Universitario en Xestión Empresarial do Deporte da UVigo, e José Ramón Lete, secretario xeral para o Deporte da Xunta de Galicia. Na súa intervención inicial, José Ramón Lete fixo fincapé na importancia da formación para o desenvolvemento profesional e tamén persoal de todo individuo. Isto, indicou, abrangue tanto ás cuestións tecnolóxicas como a outro tipo de innovacións ás que o mundo do deporte non se pode manter alleo na súa opinión. Asemade, destacou a necesidade de iniciativas e programas de formación neste eido, entre os que Máster Universitario en Xestión Empresarial do Deporte, sinalou, constitúe un referente dentro e fóra de Galicia.
Desde 2013 ata a pandemia
Durante a súa intervención, Valcarce enumerou os principais fitos da denominada “cuarta revolución industrial” que datan do ano 2013 cando Alemaña estableceu na súa axenda de goberno a estratexia de alta tecnoloxía. Unha revolución tecnolóxica que, sinalou, ten como meta a automatización, a Internet das cousas, a nube e a robótica, e que abarca a todos os ámbitos industriais, científicos ou sociais. O relator apuntou na súa intervención como foi no Foro Económico Mundial de Davos de 2016 onde Klaus Schwab afirmou que este novo cambio de era será a transición cara novos sistemas construídos sobre a infraestrutura dixital e que a velocidade do seu avance non ten precedentes na historia. Na industria deportiva, Manel Varcarce explicou como na súa opinión a transferencia destes conceptos e da cuarta revolución citada xa se están percibindo.
Dende a incorporación da tecnoloxía á sociedade e o acceso a Internet para todas as persoas, o CEO de Valgo Investiment Consultoría Deportiva sinalou como a contorna de desenvolvemento para os produtos e servizos mudou radicalmente. No contexto actual, indicou, interpretar a tecnoloxía como unha ameaza convértese nunha barreira de diferenciación fronte á competencia e a produtos substitutos. A resposta, engadiu o relator, pasa por contemplala como unha oportunidade para chegar a ser unha entidade dixital con todos os beneficios que supón tanto a xestores, adestradores como a clientes. Neste contexto, explicou como a aplicación práctica da revolución dixital nas organizacións deportivas abarca as diferentes áreas do seu desenvolvemento e xestión. Ademais, engadiu, viuse acelerada pola actual situación de crise sanitaria provocada pola covid-19, onde se produciu un cambio de paradigma tanto nos hábitos do consumidor como na propia prestación dos servizos deportivos.