Diario da Universidade de Vigo
Coa sinatura de cadanseu Contrato Programa
A Universidade de Vigo potencia o apoio aos seus tres centros CIGUS: atlanTTic, CINBIO e CIM
O obxectivo é manter e elevar o seu nivel de excelencia
Martín Llamas, Daniel Rey, Manuel Reigosa e Miguel Ángel Correa no despacho do reitor
Os responsables dos centros asinando os contratos
A Universidade de Vigo continúa a potenciar o apoio aos seus tres centros de investigación recoñecidos pola Xunta de Galicia como centros singulares: o Centro de Investigación en Tecnoloxías de Telecomunicación, atlanTTic; o Centro de Investigación en Nanomaterias e Biomedicina, CINBIO; e o Centro de Investigación Mariña, CIM. Fíxoo nesta ocasión coa sinatura de Contratos Programa que, ademais de asegurar un financiamento basal, achéganlles a estes centros unha porcentaxe de retorno dos custes indirectos, co obxectivo de manter e elevar o seu nivel de excelencia.
A sinatura destes Contratos Programa tivo lugar este luns no despacho do reitor, Manuel Reigosa, e contou coa participación dos responsables destes tres centros: Martín Llamas, de atlanTTic; Miguel Ángel Correa, do CINBIO, e Daniel Rey, do CIM.
A Rede de Centros de Investigación do Sistema Universitario de Galicia (CIGUS) está integrada por oito centros de investigación universitaria considerados punteiros: CiQUS, CiMUS, CiTIUS e Igfae, da Universidade de Santiago de Compostela; atlanTTic, CINBIO e CIM, da de Vigo (UVigo); e CiTIC da de A Coruña (UDC).