CC Económicas e Empresariais e Enxeñaría de Telecomunicación, primeiros centros do campus de Vigo con Distintivo de Empregabilidade

“En recoñecemento ao labor sobresaínte para a mellora de empregabilidade do alumnado e persoas tituladas do seu centro, así como ao fomento ás oportunidades de emprendemento”. A Universidade de Vigo entregou este xoves o Distintivo de Empregabilidade á Facultade de Ciencias Económicas e Empresariais e á Escola de Enxeñaría de Telecomunicación, converténdose así estes centros nos dous primeiros do campus de Vigo en acadar unha distinción que, nesta primeira edición, foi tamén outorgada á Facultade de Dereito, no campus de Ourense.

O acto de entrega aos centros vigueses tivo lugar este xoves pola tarde no espazo Incuvi, na praza Miralles, presidido polo reitor, Manuel Reigosa, quen se encargou de darlles os parabéns pola distinción acadada, un galardón co que a UVigo quere recoñecer a ampla traxectoria que teñen algunhas escolas e facultades na organización de actividades vinculadas á orientación profesional do seu alumnado e na intermediación universitaria no emprego, así como a súa dilatada experiencia na organización de feiras de emprego.

Os parabéns chegaron tamén da man da vicerreitora de Empregabilidade e Estudantado, Natalia Caparrini, quen explicou que con este distintivo a institución académica quere recoñecer publicamente as facultades e escolas que destaquen na promoción activa e permanente da mellora da empregabilidade do seu alumnado. Seguindo o modelo de iniciativas anteriores como o Distintivo de Igualdade, consiste nunha insignia para expoñela publicamente no centro, ten unha vixencia de tres anos (2023-2026) e vai acompañado dunha contía económica de 2000 euros que os centros poden empregar para desenvolver máis actividades ou iniciativas neste eido. 

O acto, ao que asistiu como convidada a conselleira de Promoción de Emprego e Igualdade, Elena Rivo, contou coa asistencia de  numerosos representantes de entidades públicas e privadas coas que colaboran ambos centros, así como docentes e estudantes.

Un “logro colectivo” de CC Económicas e Empresariais

A primeira en recoller o galardón foi a decana da Facultade de Ciencias Económicas e Empresariais, María Dolores Garza, quen destacou a “enorme satisfacción” que supón este recoñecemento ás actividades desenvolvidas ao longo dos anos desde a facultade para facilitar a inserción do seu alumnado no mercado laboral. “É un logro colectivo e, por iso, valorámolo dobremente”, explicou a decana, quen fixo referencia á colaboración cos distintos empregadores, á iniciativa amosada polos docentes do centro para organizar diversas actividades relacionadas co emprego e o elevado interese e participación do alumnado da facultade en ditas actividades.

“Anos apostando por estreitar os vínculos coas empresas” na EET

No caso da Escola de Enxeñaría de Telecomunicación, a directora, Rebeca P. Díaz, destacou que este distintivo supón o recoñecemento do traballo que se leva facendo na EET desde hai anos "apostando, como non podería ser doutro modo nunha escola de enxeñaría, por estreitar os vínculos coas empresas" para os procesos de calidade do centro, para a formación en competencias transversais (“a través dos programas orientaTE e integraTE”), para conseguir unha oferta variada e de calidade de prácticas externas, para promover a realización de traballos fin de titulación en empresas e para outras actividades de apoio a través da rede de traballo conexiónTeleco. 

Na súa intervención aproveitou, ademais, para agradecer o apoio do tecido empresarial coas actividades promovidas pola súa escola,  o bo ánimo do estudantado e a súa iniciativa por complementar a súa formación a través de asociacións estudantís que xurdiron na escola, “como UVIGO Space Lab, CES UVigo ou o Foro Tecnolóxico de Emprego” e tamén do PDI, “sempre activo en innovación e  transferencia co tecido empresarial, o que nos axuda moito nas sinerxías coas empresas”.